Жақында аталып өткен БАҚ қызметкерлерінің төл мерекесіне орай әріптестеріміз түрлі деңгейдегі марапат, оқырман тарапынан лайықты баға алғаны көңілге қуаныш ұялатқан еді.
Қаламдастар үшін тағы бір жағымды жаңалық, Сыр журналистикасында жарты ғасырға жуық қызмет еткен белгілі ақын, қарт қаламгер Мұхамеджан Нұрханов және өңірдің журналистика саласында өзіндік қолтаңбасы бар, «Сыр медиа» ЖШС ардагерлер кеңесінің төрағасы Кенжәлі Ерімбет Қазақстан Жазушылар одағының мүшесі атанды. Қалам иелерінің куәлігін ҚЖО облыстағы өкілі, Халықаралық «Алаш» әдеби сыйлығының иегері Қаршыға Есімсейітова табыстады.
«Сыр медиа» ЖШС мекемесі қызметкерлерінің жиыны жалғасын тауып, онда осы мекемеде әкімшілік бөлімінің басшысы, кәсіподақ ұйымының төрайымы болып көп жыл қызмет атқарған, кешегі мерекеде Қызылорда облысының Құрмет грамотасын иеленген Балкүл Тәңірбергенованы ұжымдастары зейнет демалысына шығарып салды. Жиынға мәдениет, спорт, туризм және ақпарат қызметкерлері облыстық кәсіподақ ұйымының төрайымы Раушан Үмбетова қатысып, Б.Тәңірбергенованы мерекелік төсбелгімен марапаттады.
«СБ» ақпарат
