Жедел жәрдем қызметі

281

0

Фото: Өңірлік коммуникациялар қызметі

Бас ауырып, балтыр сыздағанда жедел жәрдем қызметінің көмегіне жүгінеміз. Шақырту түсе салысымен олар көмекті қажет ететін мекен-жайдан табылуға асығады. Бұл саланың мамандары үшін әрбір секунд құнды. Адам өміріне араша түсіп, алғыс арқалаған сала мамандарының жұмысы жайында облыстық денсаулық сақтау басқармасы басшысының орынбасары Жаңыл Абубакирова мен облыстық жедел жәрдем стансасы бас дәрігерінің орынбасары Ғалия Нұрсейітова Өңірлік коммуникациялар қызметінде өткен брифингте  баяндап берді.

– Облыс бойынша 4 жедел жәрдем бекеті бар. Аудан орталықтарында да 9 бөлімше бар. Біздегі Байқоңыр қаласының ерекшелігі, қаланың ішінде Ресей Федерациясының жедел жәрдем қызметі жұмыс жасайды да, біз қала сыртындағы ауылдық округтерге қызмет көрсетеміз. Жедел жәрдемді шақырған кезде шақыру себебіне қарай 4 категорияға бөлінеді. Оларды науқаспен сөйлесу барысында диспетчер анықтайды. Категория белгілі болған соң, жедел жәрдем бригадасы жіберіледі. Дертіне шипа іздеген жандарға жедел жәрдем қызметі қашанда жедел түрде қол ұшын созуға әзір,– деді Жаңыл Исақызы.

– 2016 жылдан бастап жедел жәрдем қызметін оңтайландыру мақсатында пилоттық жоба жүзеге асырылған болатын. Сол кезден бүгінге дейін бұл жоба үздіксіз өз жұмысын атқарып келеді. Облыстық медициналық жедел жәрдем стансасы құрылымына 4 қалалық, 9 аудандық бөлімше, оперативті бөлім және медициналық авиация бөлімі кіреді. Қазіргі уақытта бұл стансаға 13 бөлімше және оперативті бөлімдер бар. Жалпы саны 50 шақырыс тобы жасақталған. 18 дәрігерлік топ, оның ішінде 4 кардио бригада, 4 педиатриялық бригада, 10 желілік дәрігерлік бригада мен 32 фельдшерлік бригада қызмет көрсетеді. Ал, халықаралық курстар бойынша 63 дәрігер, 517 орта буынды маман оқытылған. Білікті дәрігерлер бүгінде арнайы көмек көрсетуге дайын,–  деді Ғалия Талғатқызы.

Жанерке Нұрхан, Қорқыт ата атындағы Қызылорда университетінің І курс студенті.

 


>>> Біздің Facebook, Instagram парақшаларымыз бен Telegram каналымызға жазылыңыз! <<<