Жазғы демалыс – мектепте оқитын ұл-қыздар да, олардың ата-аналары мен мұғалімдері де асыға күтетін, сабақ артта қалып, арқаны кеңге салатын кезең. Дегенмен, оны қалай тиімді ұйымдастыруға болатыны кім-кімді де ойландырмай қоймайды. Сырбойылық балғындардың үш ай каникулын барынша қызықты етіп өткізу мәселесі облыстық деңгейде жолға қойылған.
Биыл өңірімізде 1-10 сынып аралығындағы 179 мыңға жуық оқушының 99,1 пайызы, яғни 177 мыңнан астамы жазғы тынығу лагерьлерінде демалады. Облыстық білім басқармасынан мәлім болғандай, аймақта 9 лагерь бар, соның 3-і, яғни «Қамбаш», «Талдысу», «Ai-Kerim» лагерьлері жыл бойы қызмет көрсетеді.
– Маусымдық демалыс орындарында 7 ауысым бойынша 4 мыңнан астам, ал жыл бойғы лагерьлерде 11,5 мыңға жуық бала қамтылады. 265 мектептің жанынан тынығу лагері ұйымдастырылады. Оған 150 мыңға жуық бала барады. 6,5 мыңға тарта оқушы «Қазақстан халқына» қорының, демеушілер мен кәсіподақтар есебінен, сонымен қатар «Балдәурен» республикалық оқу-сауықтыру орталығында тынығады. Жаңадан ашылған «Ai-Kerim» лагері 1 маусымнан бастап бала қабылдауға дайын болады, – дейді басқарма басшысының орынбасары Асхат Қанатов.
Биыл 76 млн теңге бөлініп, 7 лагерьге ағымдағы жөндеу жүргізілді.
Балалардың бос уақытын тиімді өткізуге, жаңа нәрсе үйреніп, қабілетін дамытуға көмектесетін таптырмас орта – үйірмелер. Осы орайда қызылордалық оқушыларға бір жыл бұрын пайдалануға берілген «Сыр жұлдыздары» шығармашылық және инновация академиясында барлық қолайлы жағдай жасалған. Заман талабына сай жан-жақты дамыған, ұлттық құндылықтарды бойына сіңірген, шығармашылық пен жаңашылдыққа бейім тұлға тәрбиелеуді мақсат еткен нысан жоғары стандартқа сай жабдықталған. Қосымша білім беру орталықтарының қатары кеңейіп, 150-ден астам үйірмеде 6 мыңнан астам оқушы талабын шыңдап жүр.
– Жазғы маусымда оқушылардың демалысын тиімді әрі мазмұнды ұйымдастыру мақсатында танымдық үйірмелер жұмысын жалғастырамыз. Үйірмелер ай сайынғы жоспар негізінде ұйымдастырылады. Тіркелу тәртібі, өзге де ақпараттармен әлеуметтік желідегі ресми парақшаларымыз арқылы танысуға болады. Оқушылар аптасына екі рет кестеге сәйкес түрлі бағыттағы үйірмелерге қатысады. Сабақ барысында балалардың шығармашылық, зияткерлік және танымдық қабілетін дамытуға ерекше көңіл бөлінеді. Сабақтар еркін форматта, қызықты ойындар, тренингтер мен түрлі танымдық бағдарламаларға сәйкес ұйымдастырылады. Түрлі мәдени-танымдық шаралар, шығармашылық кештер мен интеллектуалдық кездесулер арқылы оқушылардың дүниетанымын кеңейтіп, белсенді тұлға болып қалыптасуына мүмкіндік жасау басты назарда, – дейді академия директоры Жанар Бимұратқызы.
Мұнда балалар жүзуге арналған бассейн, фитнес, үстел теннисі, жекпе-жек залдарында, сурет салу, қыш құмыра жасау бөлмелерінде, медиа орталықта фото-видео монтаждау, сәндік-қолданбалы өнер мен балалар шығармашылығы шеберханаларында, дыбыс жазу студиясында, сондай-ақ робототехника және биотехнология, 3D модельдеу, КИП және автоматтандыру, спорттық робототехника, актерлік шеберлік, химия мен математика кабинеттерінде өздерін әр қырынан көрсете алады. Академия шәкірттері жыл ішінде айтарлықтай жетістікке жетіп, ұстаздарымен бірлесе атқарған тынымсыз еңбектің жарқын жемісін көрсете білді.
Назерке САНИЯЗОВА,
«Сыр бойы»
