Облыс әкімі Гүлшара Әбдіқалықова орынбасары, ҚР Президентінің «Байқоңыр» кешеніндегі арнаулы өкілі Серік Сүлейменовті және ҚР Президентінің «Байқоңыр» кешеніндегі арнаулы өкілінің қызметін қамтамасыз ету басқармасының басшысы Жасұлан Абатовтың есебін тыңдады.
Кездесуде Серік Сүлейменов Байқоңыр қаласындағы жыл көлемінде атқарылған жұмыстарды баяндады деп хабарлайды облыс әкімінің баспасөз қызметі.
Биыл Байқоңыр қаласын дамытудың ұзақ мерзімді бірлескен бағдарламасы қабылданды. Сондай-ақ оны әлеуметтік-экономикалық дамытудың 2020 жылға арналған Жол картасы бекітілген болатын.
Кездесу барысында Жасұлан Абатов міндетті әлеуметтік медициналық сақтандыру жүйесі, әлеуметтік төлемдер мәселесі мен халықтың әлеуметтік осал топтарын қолдау бағытындағы қарқынды іс-шараларды атап өтті. Байқоңыр қаласындағы коммуналдық қызметтерге жоғары тарифтерді ескере отырып, келесі жылы ақы төлеу кезінде қала тұрғындарының шығындарын өтеуді ұлғайту жоспарланғанын тілге тиек етті.
Өз есебінде Жасұлан Абатов қазақстандық балабақшалардың санын арттыру мақсатында Ресей тарапына жалға берілген мүліктер тізбесінен шығарып, Қармақшы ауданы әкімдігінің коммуналдық меншігіне беру бойынша атқарылған жұмыстарды атап өтті. Сонымен бірге қаланың ойын-сауық және туристік әлеуетін арттыру және қонақ үй ашу үшін әкімшілік ғимаратты жалдан шығару мәселесіндегі іс-әрекетті баяндады.
Бүгінгі күні Байқоңыр қаласында медициналық мәселелер кезең-кезеңімен шешілуде. Медициналық мекеме 13 өкпені жасанды желдету аппараты және 56 оттегі концентраторымен жабдықталған. Көпбейінді ауруханада 185 төсек-орынға провизорлық стационар ашу мүмкіндігі қарастырылған. Сонымен қатар, Төретам ауылдық ауруханасы аумағында 25 орындық провизорлық төсек орнын ашу үшін Байқоңыр қаласы кәсіпкерлерінің қолдауымен бос тұрған ғимараттардың біріне жөндеу жұмыстары жүргізілген.
Келер жылы Байқоңыр қаласындағы сумен жабдықтау және су бұру жүйелерін реконструкциялау және жаңғырту жобалары іске асады. Сондай-ақ бес 50 пәтерлі тұрғын үй салу үшін республикалық бюджет комиссиясының шешіміне сәйкес қаражат бөлу алдын ала қолдау тапқан. Бұл жаңа жұмыс орындарының ашылып, қаланың әлеуметтік мәселесінің оң шешім табуына ықпал етеді.
Жылдық қорытынды есебінде Жасұлан Абатов «Бақытты отбасы» орталығын Байқоңыр қаласынан ашу жөніндегі жоспарын айтып, жаңа орталық қаладағы әлеуметтік осал топтағы отбасылар мен зейнеткерлер, мүмкіндігі шектеулі азаматтарға қызмет көрсетудің қолжетімділігін арттыратынын жеткізді.
Облыс әкімі Жасұлан Абатовқа «Жол картасы» бойынша жобаларды жалғастырып, негізгі басым бағыттардағы жұмысты ширата түсуді тапсырды.
>>> Біздің Facebook, Instagram парақшаларымыз бен Telegram каналымызға жазылыңыз! <<<
