Жыл басынан бері міндетті әлеуметтік медициналық сақтандыру жүйесі енгізіліп, шілде айына дейін барлық азаматтар шартты түрде сақтандырылған болатын.
Соның негізінде тұрғындарға тегін медициналық көмектің кепілдік берілген көлемі мен МӘМС жүйесіндегі медициналық пакеттер теңдей көрсетілді. Қазіргі кезде шартты кезеңнің уақыты аяқталды. Оның үстіне елге келген қауіпті індет халықты қалыпты өмірден ажыратып, шектеу шараларына бағынудан басқа амал қалдырмағаны белгілі. Айлар бойы жалғасып келе жатқан карантиндік шектеулер әсіресе, шағын және орта бизнес өкілдерінің жұмысына едәуір кедергі келтірді. Табыссыз қалғандар сақтандыру жарнасын төлеу қабілетінен де айырылғаны жасырын емес. Осы және өзге де себептерден қазіргі уақытта азаматтар емхана мен ауруханаларға жүгінген кезде сақтандырылғандар санатына жатпай қалу жағдайы көптеп туындап отыр. Бұл туралы облыс әкімдігінде өткен мәжілісте «Әлеуметтік медициналық сақтандыру қоры» КЕАҚ облыстық филиалының директоры Бақыт Исмаханбетов мәлімдеді. Жиынға облыстық кірістер департаменті, білім, кәсіпкерлік, жұмыспен қамтуды үйлестіру және әлеуметтік бағдарламалар басқармалары мен «Атамекен» ҰКП өкілдері қатысты.
Белгілі болғанындай, мемлекеттің 15 санат үшін төлейтін МӘМС жарнасынан түсіп қалу, өз мәртебесінің дұрыс анықталмауы, қаражаттың дұрыс аударылмауы, тағы басқа себептер бар.
– Мысалы, жоғары немесе орта арнайы оқу орнында оқитын студенттердің мәртебесі «сақтандырылмаған» болса, олар өздері оқитын оқу орнына жүгінуі тиіс. Оқу орнының әкімшілігі әрбір студенттің аты-жөні мен ЖСН-ін ақпараттандыру жүйесіне енгізуге міндетті. Егер студент шетелде оқитын болса, ол Білім және ғылым министрлігінің сандық трансформация департаментіне оқу орнында оқитынын дәлелдейтін құжаттарын ұсыну қажет. Сондықтан бұл мәселе білім басқармасының құзырында. Егер жеңілдігі бар санаттағы адамдар, оның ішінде жұмыс істемейтін жүкті әйелдер, 3 жасқа толмаған баласы барлар, мүгедек бала күтімімен айналысатын азаматтар, бала кезінен бірінші топтағы мүгедекке күтім жасайтын жұмыс істемейтін адамдардың мәртебесі «сақтандырылмаған» болса, олар облыстық жұмыспен қамтуды үйлестіру және әлеуметтік бағдарламалар басқармасы мен Азаматтарға арналған үкімет мемлекеттік корпорацияның облыстық филиалына жүгіну керегін айтамыз, – деді филал директоры.
Сондай-ақ, жұмыс берушілердің қарамағындағы қызметкерлерге еңбек демалысы кезінде жарна аудармау жағдайының да жиі кездесетіні белгілі болды.
Тағы бір айта кетерлігі, 42500 теңге әлеуметтік көмек алған кезде жұмыссыз ретінде тіркеуде тұратын, яғни, 15 санатқа жататындар бірыңғай жиынтық төлемді бір айға төлеу арқылы өз мәртебесінен айырылуда. Нақтырақ айтқанда, бірыңғай жиынтық төлем төлеп, 42500 әлеуметтік төлем алған азаматтар автоматты түрде «өзін өзі жұмыспен қамтығандар» мәртебесіне ие болып кетеді де, жарна төлеуге міндетті болып шығады екен. Сондықтан мұндай азаматтар облыстық жұмыспен қамтуды үйлестіру және әлеуметтік бағдарламалар басқармасына жүгініп, өз мәртебелерін анықтағаны абзал.
Пандемия кезінде шағын және орта бизнес субъектілері үшін жеңілдік жасалғаны белгілі. Үкіметтің арнайы Қаулысымен бизнес өкілдері салық төлемдері мен қарамағындағы қызметкерлеріне сақтандыру жарнасын төлеуден босатылды. Бұл орайда ШОБ қызметкерлерінің медициналық көмек алу құқығын биылғы 1 қазанға дейін ұзарту туралы шешім қабылданған болатын.
Жиында сала өкілдері сұрақтарын қойып, оған тұшымды жауап берілді.
Айнұр БАТТАЛОВА,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
