1 ақпаннан бастап екпенің алғашқы 1000 дозасы өңірге жеткізіліп, алғашқы кезеңде ол медицина саласының қызметкерлеріне, педагогтар мен полиция қызметкерлеріне салынды.
Деректерге сүйенсек, бүгінге дейін коронавирус инфекциясына қарсы екпенің І компоненті 7119 адамға, ІІ компоненті 2623 адамға егілген. Бұл туралы облыстық
денсаулық сақтау басқармасының басшысы Сәбит Пазылов өңірлік коммуникациялар қызметінде өткен брифингте хабарлады.
Басқарма басшысының айтуынша, вакцинациялау №1, 3, 4, 5, 6 қалалық емханаларда және барлық аудандарда, сонымен қатар Байқоңыр қаласында жүргізілуде. Ол үшін алғашқы медициналық-санитарлық көмек мекемелерінде 14 егу кабинеті дайындалған.
– Өңірге 1 сәуір күні қосымша вакцинаның тағы 12000 дозасы келді, екпе жұмыстары жалғасуда. Айта кету керек, вакцина тасымалдауда қажетті ұстаным бар. Барлық екпе талапқа сай, температуралық режимді қадағалайтын арнайы көлікпен жеткізілуде. Инфекцияға қарсы егу Денсаулық сақтау министрлігінің бастамасымен «Спутник V» ресейлік вакцинасының кепілдік берілген көлемін бөлу жөніндегі келісім негізінде және ерікті түрде жүргізілуде, – деді Сәбит Пазылов.
Жиында денсаулық сақтау саласының ардагері Тұрғанбай Маханов қазір екпені ем дейтіндер мен пайдасы кем дейтіндердің таласы тоқтамағанын, алайда алдын алу шараларына бейжай қарауға болмайтынын еске салды. Індеттің алдын кесуде қырағылық танытып, тұрғындарды сақтық талаптарын аттамауға шақырды.
>>> Біздің Facebook, Instagram парақшаларымыз бен Telegram каналымызға жазылыңыз! <<<
