Облыс орталығындағы №3 қалалық емхананың жоғары санатты дәрігер-зертханашысы Бақыткүл Сейтмамбетова – дәрігерлер отбасының мүшесі.
Қазалы ауданының тумасы Бақыткүл Қалмырзақызы дүниеге келген үлкен әулеттегі алты ағайындының бесеуі дәрігер, отбасында рентгенолог, пульмонолог, лаборант, акушер-гинеколог, терапевт мамандар бар. Екеуі Қызылорда және Ақтөбе медициналық жоғары колледждерінде оқытушы болып, орта буын мамандарын даярлау ісіне үлес қосуда.
Бақыткүл Қалмырзақызы 1989 жылы Ақтөбе мемлекеттік медицина институтын (қазіргі уақытта М.Оспанов атындағы медицина университеті) бітірген. Қызылорда облыстық ауруханасының гастроэнтерология бөлімшесінде терапия мамандығы бойынша интернатурадан өткен. Сол кездері облыста дәрігер-лаборант мамандардың жетіспеушілігіне байланысты 1990 жылы облыстық аурухананың клиникалық-диагностикалық зертханасының дәрігер-лаборанты қызметіне қабылданып, еңбек жолын бастап кеткен.
Науқасқа диагноз қоюда зертханалық зерттеулердің маңызды ролін терең түсініп, бірнеше рет республика, ТМД көлемінде білімін жетілдіріп, үнемі ізденісте болды, жаңалықтар енгізіп, облыстың зертхана саласының дамуына өзіндік үлес қосты.
1995 жылы облыстық кеңес беру-диагностикалық орталығы зертхана бөлімшесінің меңгерушісі қызметіне тағайындалды. Алты зертхана бөлімінің жұмысын жүргізді, облыс көлемінде алғашқы радиоиммунологиялық зертхана бөлімінің ашылуына септігін тигізді. Осы мекемеде 25 жыл еңбек етті, сонымен қатар облыстық денсаулық сақтау басқармасында зертхана саласы бойынша штаттан тыс бас маман қызметін қоса атқарды.
2014-2016 жылдар аралығында қалалық ауруханада, 2016 жылдан бері №3 қалалық емханада зертхана бөлімінің меңгерушісі қызметін абыроймен атқарып келеді. Осы бөлімде қазіргі уақытта 2 дәрігер, 6 орта буын зертханашы жұмыс істейді. Жұмыс орны соңғы үлгідегі автоматтандырылған гематологиялық, биохимиялық, иммунологиялық заманауи анализаторлармен жабдықталған. Күніне 120-180 зерттеу жүргізіледі.
Өз ісінің білікті маманы Бақыткүл Сейтмамбетова білім-біліктілігінің, мол тәжірибесінің, үнемі ізденісте болып, жаңашылдыққа ұмтылуының арқасында облыста зертхана саласының дамуына үлес қосып келеді. Бас маман ретінде барлық ауданмен тығыз байланыста болып, әріптестеріне тәжірибелік-әдістемелік көмек көрсетуде, орта буын зертханашыларды дайындау, білімін жетілдіру ісіне де терең үңіліп, түрлі курстар, семинар оқулар, конференция, «Үздік зертханашы» сайыстарын ұйымдастыруға көңіл бөледі. Кәсібіне адал, білікті маман көрген-білгенін жастарға үйретуден жалыққан емес. Сол қасиетімен де ортасына сыйлы.
Саналы ғұмырын денсаулық сақтау саласының дамуына арнаған жанның еңбегі ескерусіз қалмайды. Бақыткүл Қалмырзақызы 2006 жылы «Үздік дәрігер» номинациясын иеленсе, 2009 жылы «ҚР Денсаулық сақтау ісінің үздігі», 2020 жылы «Денсаулық сақтау ісіне қосқан үлесі үшін» төсбелгілерімен марапатталды. Білікті дәрігердің еңбек жолы жастарға үлгі-өнеге.
Айнұр БАТТАЛОВА,
«Сыр бойы»
