Былтыр Шиелі ауданында 39,4 млрд теңгенің өнімі өндіріліп, алдыңғы жылмен салыстырғанда 116 процентті құраған. Өңдеуші өнеркәсіп бойынша өндірілген өнім көлемі де артып, 16,5 млрд теңгені көрсеткен. Ауданда осы және өзге де атқарылған жұмыстар туралы өңірлік коммуникациялар қызметінде өткен брифингте аудан әкімі Қамбарбек Мүбараков жан-жақты баяндады.
– Былтыр пандемияға байланысты елде төтенше жағдай жарияланғаны белгілі. Төтеннен келген індет қоғамның қай саласына да ауыр соқты. Елді жайлаған қауіпті кесел ауданымызда да тіркеліп, тұрғындардың 307-сі ауырып, емделіп шықты. Дегенмен, қиындықтарға қарамастан, ауданның әлеуметтік-экономикалық маңызды мәселелері кезең-кезеңімен шешімін тауып, халықтың әлеуметтік жағдайын жақсартуда біршама жұмыстар атқарылып, серпінді жобалар жүзеге асырылды, – деді ол.
Аудан әкімінің айтуынша, тіркелген шағын және орта кәсіпкерлік саны 5241 субъектіні құраса, биылғы 1 наурыздағы мәлімет бойынша 5274-ке жетті. Оның ішінде жұмыс істеп тұрғаны – 4904.
Сондай-ақ, есепті мерзімде кәсіпкерлік саласы бойынша мемлекеттік бағдарламалар аясында 919 адамға 1 млрд 884,8 млн теңгенің гранты мен несие қаражаты берілген. Ал биылғы екі айда «Еңбек» мемлекеттік бағдарламасы бойынша 80 азаматқа кәсіп бастау үшін 46,6 млн теңге қайтарымсыз грант беріліп, 12 адам жұмыспен қамтылған.
«Бизнестің жол картасы-2025» бағдарламасы аясында жобалық құны 82,2 млн теңгені құрайтын 6 жоба қаржыландырылған.
Былтыр 29461 гектар жерге ауыл шаруашылығы дақылдары егілді. Күріштің көлемі 14353 гектарды құрап, әр гектардан 59,9 центнерден өнім алынып, 85940 тонна астық жинаған.
– Азық-түлік қауіпсіздігін қамтамасыз ету және азық-түлік өнімдерінің импортын азайту мақсатында биыл күтілетін су тапшылығы салдарынан дәнді дақылдар үлесін 2379 гектарға, картоп, көкөніс, бақша дақылдарын 5157 гектарға ұлғайту көзделуде. Сонымен бірге 70 гектарға соя егілетін болады, – деді Қ.Мүбараков.
Ауданда жергілікті өнімді экспортқа шығару да жолға қойылған. Мәселен, былтыр 120 тонна күріш, 850 тонна қарбыз, 1005 тонна қауын және 351 тонна қызанақ Ресей және Қырғызстан елдеріне жөнелтілген.
Айнұр батталова,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
