Өңірлік коммуникациялар қызметінде облыстық индустриялық-инновациялық даму басқармасының басшысы Ринат Сұлтангереев БАҚ өкілдеріне арнап брифинг өткізді.
– Облыс әкімдігі өңір экономикасының мұнай мен уранға тәуелділігін ескеріп, жыл бойы Үкіметпен экспортқа шығарылатын мұнай көлемін ұлғайту, газға әділ баға қою және жаңа кеніштерді игеру мәселелерін шешу бойынша тиісті жұмыстар жүргізуде. Қазіргі таңда аталған мәселелер орталық атқарушы органдардың қарауында. Осыған орай, экспортқа бағытталған бәсекеге қабілетті өндірістерді құру мен дамыту бағытындағы жұмыстар жалғасып жатыр. Сонымен бірге, мұның барлығы индустриялық-инновациялық дамытудың мемлекеттік бағдарламасы аясында жүзеге асырылуда, – деді Ринат Қалдыбекұлы.
Бүгінде өңірде бағдарлама шеңберінде құны 512 млрд теңгеден асатын 25 жоба қолға алынып, қазіргі сәтте 7-і іске қосылған. Оның ішінде құрылыс индустриясы саласында 2 өндіріс орны бар. Олар – Жаңақорған ауданындағы қуаттылығы 75 мың тонналық әк зауыты мен Шиелі ауданындағы цемент зауыты. Биыл бұлардың қатарына шыны зауыты мен балық өңдейтін цех қосылатын болады. Бұған қоса, алдағы уақытта “Шалқия” кен орнындағы тау-кен байыту комбинаты, кальцийленген сода зауыты, жылына 1500 тонна ет өңдейтін құс фабрикасының және балықты тереңінен өңдеу зауыттарының құрылысы басталмақ. Сондай-ақ, томат пастасы өндірісінің жобасы бойынша зауыт салу мәселесі де наурыз айында өз шешімін таппақ.
Жалпы атқарылған жұмыстар нәтижесінде өткен жылы өңірге тартылған инвестиция көлемі 25,5%-ке артып, 325,5 млрд теңгені құрайды. Оның ішінде өңдеу өнеркәсібіне тартылған инвестиция көлемі 37,6%-ке артқан. Ал сыртқы инвестиция көлемі 1,7 есеге өсіп, 98,2 млрд теңгеге жеткен.
Брифингте облыстық кәсіпкерлік және туризм басқармасы басшысының орынбасары Азамат Досжанов та салада атқарылып жатқан жұмыстар жайын баян етті.
Оның айтуынша, жаппай кәсіпкерлікті дамытудың үш жылдығы аясында арнайы Жол картасы әзірленіп, бірқатар шаралар жасалынған. Өткен жылы шағын және орта кәсіпкерлік субъектілерінің саны 49991 бірлікті құраса, биыл бұл көрсеткіш 51078-ге жеткен. Осыған сәйкес, 9 айдың көрсеткіші бойынша 90 мыңнан аса адам жұмыспен қамтылып, 250 млрд теңгенің өнімі өндірілген.
– Салада мемлекеттік бағдарламалар да өз дәрежесінде жүргізілуде. Әсіресе, аудан тұрғындары белсенділігі артуда. Мәселен, “Бизнестің жол картасы-2020” бағдарламасы негізінде Арал ауданы 1 млрд теңгеге 16 жоба және Жалағаш ауданы 459 млн теңгеге 9 жоба шығарды. Ал, “Нәтижелі жұмыспен қамту және жаппай кәсіпкерлікті дамыту” бағдарламасы бойынша Сырдария ауданынан – 167, Жаңақорғаннан – 164, Қармақшыдан 148 кәсіпкер шағын несие алуға белсенді қатысты. Бағдарлама аясында шағын несиелер беру үшін бөлінген қаражаттың 569,3 млн теңгесін Жаңақорған ауданы алып, алдыңғы қатарды иеленді, – деді облыстық кәсіпкерлік және туризм басқармасы басшысының орынбасары Азамат Досжанов.
Жиын соңында баяндамашыларға тілшілер тарапынан бірқатар сұрақтар қойылып, нақты жауаптар алынды.
>>> Біздің Facebook, Instagram парақшаларымыз бен Telegram каналымызға жазылыңыз! <<<
