Қазақстан Республикасының Президенті Қасым-Жомарт Тоқаевтың «Тәуелсіздік бәрінен қымбат» атты мақаласында Қазақстанның дамуы және қалыптасу кезеңі түгел қамтылып, ел басынан өткен тарих пен келешек туралы баяндалған.Биыл қастерлі Тәуелсіздігімізге 30 жыл толады. Бұл – қайта жаңғырған қазақ мемлекетінің, ата-бабаларымыз аңсаған азаттықтың тұғыры нығая түскенін айқындайтын маңызды белес. «Отыз жылда біз қандай жетістіктерге жеттік?», «Келер ұрпаққа қандай елді аманаттаймыз?», «Мемлекеттігімізді нығайта түсу үшін тағы не істейміз?» деген сауалдар бәрімізді толғандырары анық. Бұл – арман-мақсаттарымызды тоғыстырып, болашаққа тың серпінмен қадам басу үшін өткенге тағы бір мәрте оралатын, жетістіктеріміз бен кемшіліктерімізді ой елегінен өткізетін маңызды кезең екенін ұмытпағанымыз жөн.
Тәуелсіздіктің алғашқы онжылдығында Қазақстанның іргетасын қалап, көршімізбен шекарамызды айқындадық. Әрбір азаматтың игілігіне қызмет ететін өз Ата заңымыз қабылданды. Шетелдермен дипломатиялық қатынас орнатып, еліміз беделді халықаралық ұйымдарға мүше болды. Іргелес мемлекеттермен шекара жөніндегі келіссөздер қарқынды жүргізіліп, ядролық қарудан бас тартып, елордамыз жаңа Астанаға көшірілді.
Екінші онжылдықта «Мәдени мұра» бағдарламасын жүзеге асырып, тарихымызды түгендедік. Әртүрлі жобаларға қатыса отырып, «Қазақстан – 2050» стратегиясын қабылдап, озық дамыған отыз елдің қатарына қосылуды межеледік. Толағай табыстардың бәріне Елбасының дара көшбасшылығының халқымыздың даналығы мен парасатының, бірлігі мен ынтымағы жарасқан отандастарымыздың қажырлы еңбегінің арқасында екені бәрімізге мәлім. Келер ұрпаққа Қазақстанды тұғыры мығым, экономикасы қуатты, рухы асқақ мемлекет ретінде табыстау және елдік істерді шашау шығармай лайықты жалғастыратын жасампаз ұрпақ тәрбиелеуді ұмытпадық.
ХХІ ғасыр – ғылым ғасыры. Еліміз болашақта көркейіп өркениетті елдер қатарына қосылатыны бүгінгі ұрпақ бейнесінен көрінеді. Халқымыздың ардақты ұлдарының бірі Міржақып Дулатов «Жалғыз сүйеніш, жалғыз үміт – оқуда, теңдікке жетсек те, жұрттығымызды сақтасақ та, дүниедегі сыбағалы орнымызды алсақ та, бір ғана оқудың арқасында аламыз. Жақсылыққа бастайтын жарқын жұлдыз – оқу. Надан жұрттың күні–қараң, келешегі–тұман» деп ғылым, білім, оқудың маңызын қара халыққа көрсеткен.Талантты ұл-қыздарымыздан дарын иелері шығып, биік белестерді бағындыруда. Бүкіл әлемді аузына қаратқан ғажайып дарын иелері де жеткілікті. «Тегінде адам баласы адам баласынан ақыл, білім, ар, мінез деген қасиеттерімен озады» деп Абай атамыз айтқандай, озық ойлы, білімдар адамдар заманның, қоғамның дамуына, өзгеруіне үлесін қосып келеді.
Ел Президентінің жер мәселесіне орай айтылған пікірінің де құндылығы жоғары. Ата-бабамыздан қалған жерімізді ешкімге сатпау, шекара туралы ойы салмақты.
Қазақстанда ел болашағы – жас ұрпақтың әлемдік стандартқа сай білім алуы үшін барлық жағдай жасалған. Бұл – мемлекеттің даму саясатының басым бағыттарының бірі. Болашақта білімді де қабілетті жастардың ел үшін аянбай еңбектеніп, Қазақстанның даңқын асыратынына, мәртебесін асқақтататынына сенемін. Әр қазақ елін, жерін сақтап қалуға, оны қастерлеуге міндетті. Қастерлі Тәуелсіздігіміз барша жұртымыздың патриоттық рухымен асқақтап, тұғырлы болғай!
Гүлшаһар ӘЙШІМОВА,
№266 мектеп-лицей директорының орынбасары.
Әйтеке би кенті
>>> Біздің Facebook, Instagram парақшаларымыз бен Telegram каналымызға жазылыңыз! <<<
