Жаздың ыстық күнінде көпшілік табиғатта, өзен, көл жағасында демалуды ұнатады. Әрине, таза ауада демалу денсаулыққа орасан зор пайдасын тигізеді. Бірақ су қауіпті болуы мүмкін. Балалар кейде қауіп-қатерді байқамай, ережелерді сақтамастан суға түсіп жатады. Сондықтан демалыс орнына бармас бұрын балаларға судағы қауіпсіздік ережелерін түсіндіріп және оларды қадағалау маңызды.
Мамандардың сөзінше, балалар мен ересек адамдар арнайы рұқсат етілген су айдындарында ғана шомылуға тиіс. Ал бақыланбаған, шомылуға болмайтын жерлерде суға түсуге, сүңгуге болмайды.
– Қызылорда қаласы бойынша 16 қауіпті учаске бар. Сол жерлерде суға түсуге болмайды. Ал шомылуға болатын екі жер бар. Олар – жағажайлар, яғни «Эделвейс» және «Сыр толқыны». Ал қалған каналдар мен көлдерге, су айдындарына түсуге болмайды. Себебі ол тұстар тексерілмеген, тереңдігі белгісіз, астындағы қауіпті заттар жайлы ақпарат жоқ, – дейді қалалық төтенше жағдайлар басқармасының аға инженері, азаматтық қорғау лейтенанты Елдар Талғатұлы.
Оның айтуынша, балалар шомылу үшін түбі тексерілген, құтқарушы қызметкерлері бар, жабдықталған жағажайларды ғана таңдауы қажет. Сосын сапалы құтқару жилеттерін пайдалану керек.
Тексерілмеген жағажайларда түрлі инфекциялар болуы мүмкін. Әрбір ата-ана бала өміріне жауапты болғандықтан, шомылу ережелерін дұрыстап түсіндіру міндеттеледі.
– 18 жасқа толмаған балаға заңды өкілі ретінде ата-анасы жауап береді. Егер балалардың рұқсат етілмеген жерге суға түскені анықталса, заңды өкіліне әкімшілік шара көріледі. Қараусыз қалдырғаны, су айдындарында қауіпсіздік қағидаларын бұзғаны немесе орындамағаны анықталса, айыппұл салынады, – дейді Елдар Талғатұлы.
Суға түсу маусымында қауіпсіздікке ерекше көңіл бөлген жөн. Балаларды қараусыз қалдырмай, әрдайым бақылауда ұстауымыз керек. Ереже сақтамау қайғылы жағдайлар мен түрлі ауруларға шалдығуға әкеп соғатынын есте сақтаған дұрыс.
Дінмұхамед КӘКІМЖАНОВ,
Қорқыт ата атындағы Қызылорда университетінің І курс студенті
