Бүгінде ерекше мәнерлі әнші Димаш Құдайбергеннің есімі төрткүл дүниеге таралды. Нағыз елшіл азаматтар өзінің өрлеген атақ-даңқымен туған еліне қызмет етуге құштарланатыны дәлелді қажет етпесе керек. Өйткені, туған елдің қасиетінен биік ештеңе болмақ емес. Жақында ол ҚР Мәдениет және спорт министрі атынан «Қазақстан Республикасының туризм жөніндегі елшісі» мәртебесін иеленді. Оның құжатын Ақтөбе қаласында әншінің «Димаштың Отаны» атты турға қатысушы 10 мемлекеттен келген топтардың жетекшілерімен кездесу кезінде «Kazakh Tourism» ҰК» АҚ басқарма төрағасы Рашид Күзембаев табыстады.
– Бір жарым ай бұрын футболист Месси әлем туризмінің елшісі атанды. Біз де Димашқа қазақстандық туризм елшісінің сертификатын ұсынып отырмыз. Ол өз елінің патриоты,– деді осы сәтте басқарма төрағасы.
Миллиондардың сүйіктісі болған «Барселона» ойыншысы Лионель Месси әлемдегі ең алғашқы Finney криптосмартфонын жасаумен айналысатын Sirin Labs компаниясының елшісі атанған еді.
Израильдік кәсіпкерлермен бірлесе отырып, қазақстандық бизнесмен негізін қалаған компания биылдан бастап блокчейн технологиясымен жұмыс істейтін смартфондар шығара бастайды.
Ал, Димаш Құдайберген туризм елшісі ретінде Қазақстанды халықаралық деңгейде ілгерілетуді және әлемнің түкпір-түкпірінен өз тыңдармандарын елімізді көруге шақыруды белсенді түрде жалғастырады.
Ол өз концерттерінде және БАҚ көздерінде әрқашан фанаттарын Қазақстанға шақырып жүреді. Турдың идеясы да осыдан шыққан. Ал маршрут құрамына шетелде үнемі айтып жүретін туған қаласы – Ақтөбе, елордамыз Астана және ең үлкен қаламыз Алматы кірді.
Жалпы тур әншінің балалығы, шығармашылығымен байланысты жерлерге баруды мақсат етеді. Тур маршруты әншінің Ақтөбедегі мектебін көруді, артистің жақындары және туыстарымен түрлі кездесулерді, Димаштың ұстазы әрі Қазақстан Республикасының еңбек сіңірген қайраткері Марат Әйтімовтің шеберлік сабағы және тағы басқа шараларды қамтиды.
Ал осы турлардан түскен қаржының бір бөлігі келешекте әншінің брендін әлемдік деңгейде одан әрі нығайтуға және өрлетуге бағытталады.
Р.ДҮЙСЕНҰЛЫ.
>>> Біздің Facebook, Instagram парақшаларымыз бен Telegram каналымызға жазылыңыз! <<<
