Елімізде маусым айының үшінші жексенбісін – «Әкелер күні» болып мерекелік күнтізбеге енгізу отбасылық құндылықтарды дәріптеуге, сондай-ақ әкелер институтын дамытуға ықпал етіп келеді.
Жалпы отбасының беріктігі ер-азаматқа тікелей байланысты. Халқымызда әкені ерекше құрметтеп, мәртебесін жоғары қою дәстүрі қалыптасқан. Отбасы құндылықтарын сақтай отырып, бала тәрбиесіндегі әке рөлінің маңызын көрсету, әке мен баланың өзара қарым-қатынасын нығайтуда бұл күннің маңызы ерекше. Өйткені әке – отбасы үшін күш-қуаттың, даналық пен жауапкершіліктің қайнар көзі. Баланың тұлға ретінде қалыптасуына ықпал ететін рухани тірек.
Елімізде әкелер институтын дамыту – отбасылық және гендерлік саясаттың маңызды бағыты. Бұл міндет 2030 жылға дейінгі отбасылық гендерлік саясат тұжырымдамасында көрініс тапқан және осы бағытта нақты шаралар қабылдануда. Әкелер институтын қолдау үшін түрлі іс-шаралар ұйымдастырылады.
2012 жылдан бері республикалық «Әкелер одағы» қоғамдық бірлестігі табысты жұмыс істейді. Оған барлық өңірдегі белсенді әкелер біріккен. Мәселен, мектеп жанынан әкелер кеңесі, клубтар құрылып, олар отбасы мен бала тәрбиесіне белсенді қатысып келеді. Осылайша «Әкелер одағы» бірқатар маңызды жобаны жүзеге асыруда. Бұдан бөлек, отбасы құндылықтарын нығайту мен тәжірибе алмасуға мүмкіндік беретін республикалық форум өткізіледі. Онда елдің түкпір-түкпірінен белсенді азаматтар мен әкелер бас қосып, бала тәрбиесіне қатысты өзекті мәселелер талқыланады.
Өңірде қоғамдық бірлестіктің филиалы құрылған еді. Негізгі мақсаты – отбасы және ұлттық құндылықтарды дәріптеу. Ер балаларға болашақта әке міндетін ұғындыру және бала тәрбиесіне араласуына оқу орындарымен байланыста болып ықпал жасау. Филиал отбасы тақырыбында түрлі жемісті жобаларды жүзеге асырып келеді.
Айтулы күн аясында түрлі іс-шаралар ұйымдастыру дәстүрге айналған. Мәселен «Отбасы орталығында» «Адырна» бенефис шоуы өтеді. Шара үш бөлімнен тұрады. «Әке – бала тағдырындағы тұғыр» кезеңінде өздерін таныстырады. Ал «Әке – тірек, бала – тілек» бөлімінде өнерін ортаға салса, «Әке мен бала: жүректен жүрекке» кезеңінде баласы әкесіне қолдан жасалған сыйлық ұсынады. Сондай-ақ өнерлі отбасылар ән-жырдан шашу шашып, қонақтарға әсерлі көңіл-күй сыйлайды.
Айта кетейік, «Әкелер күніне» орай облыс орталығы мен барлық аудандарда түрлі форум, көңілді спартакиада, жиындар және танымдық кездесулер өтеді.
Сара АДАЙБАЕВА,
«Сыр бойы»
