Өңірдің денсаулық сақтау саласының аса көрнекті ұйымдастырушысы, білікті дәрігер, тәжірибелі басшы, ұлағатты ұстаз әрі медицина саласының құрметті ардагері Базарбай Асанбайұлы Атабаевтың есімін әрдайым құрметпен еске аламыз.
Базарбай Асанбайұлы 1937 жылдың 10 қарашасында Сырдария ауданындағы (қазіргі Шиелі ауданы) «1 Май» колхозында дүниеге келген. Еңбек жолын фельдшер ретінде бастап, кейін Алматы мемлекеттік медицина институтының педиатрия факультетін тәмамдаған. Туған өлкесіне оралып, балалар хирургі болып қызмет атқарды.
Саналы ғұмырын өңірдің денсаулық сақтау жүйесін дамытуға арнады. Балалар хирургі, облыстық денсаулық сақтау саласының штаттан тыс бас балалар хирургі, аудандық және облыстық деңгейдегі басшылық қызметтерде еңбек ете жүріп, аймақ медицинасының қалыптасуы мен өркендеуіне өлшеусіз үлес қосты.
1975 жылдан облыстық денсаулық сақтау саласының ұйымдастыру-әдістемелік қызметін басқарған кезде медициналық көмектің сапасын арттыру, статистика мен денсаулық сақтау менеджментін жетілдіру бағытында ауқымды жұмыстар жүргізілді. Базарбай Асанбайұлының тікелей бастамасымен облыстық ауруханада алғаш рет балалар хирургиясы бөлімі ашылып, жас мамандар кәсіби тұрғыда қалыптасты.
1982-1988 жылдары облыстық денсаулық сақтау бөлімі меңгерушісінің бірінші орынбасары қызметін атқарып, барлық аудан мен елді мекенде медициналық көмектің қолжетімді болуына ерекше назар аударды. Жаңа ауруханалар, емханалар, фельдшерлік-акушерлік пункттер, зертханалар мен дәріханалардың ашылуына ұйытқы болып, оларды мамандармен және қажетті құрал-жабдықтармен қамтамасыз етуге үлкен еңбек сіңірді.
Базарбай Асанбайұлы шалғай ауыл тұрғындарына медициналық көмекті жақындату, ана мен бала денсаулығын қорғау, жұқпалы аурулардың алдын алу, кадрлардың білімін жетілдіру бағытындағы жұмысты жүйелі ұйымдастырды. Оның бастамасымен жылжымалы дәрігерлік амбулаториялар қызметі дамып, профилактикалық медицинаның тиімді үлгісі қалыптасты.
Өңір медицинасы тарихындағы ең ірі жобалардың бірі Қызылорда облыстық жұқпалы аурулар ауруханасының салынуы мен қалыптасуына Базарбай Асанбайұлының қосқан үлесі ерекше. Оның табандылығының арқасында типтік жобадағы жұқпалы аурулар ауруханасы салынып, 1988 жылы өзі осы мекеменің бас дәрігері болып тағайындалды. Кейін бұл аурухана республикадағы үздік медициналық ұйымдардың біріне айналды.
Ол облыстың бас инфекционисі ретінде ғана емес, республика көлеміндегі жұқпалы ауруларды емдеу қызметінің дамуына да елеулі үлес қосты. Ғылыми-зерттеу жұмыстарымен айналысып, 30-дан астам ғылыми мақала жазды. Оның жетекшілігімен жұқпалы аурулар қызметінің тарихына арналған ғылыми жинақтар жарық көрді.
Базарбай Асанбайұлының еңбегі мемлекет тарапынан жоғары бағаланды. Ол «Халықтар достығы» орденімен, «КСРО Денсаулық сақтау үздігі», «Қазақстан Республикасының Денсаулық сақтау үздігі» төсбелгілерімен, көптеген медальмен, Құрмет грамоталарымен және басқа да жоғары марапаттармен наградталды. «Шиелі ауданының құрметті азаматы» атағына ие болды.
Медицина саласындағы еңбегімен қатар, ол қоғам өміріне де белсене араласты. Мұстафа Шоқай мұрасын зерттеу мен насихаттау ісіне зор үлес қосып, арнайы қор құрып, ғылыми және тарихи еңбектердің жарық көруіне ықпал етті. Оның бұл бағыттағы қызметі халықаралық деңгейде жоғары бағаланды.
Базарбай Асанбайұлы кәсіби шеберлігімен ғана емес, адамгершілік қасиеттерімен де көпшілікке үлгі болды. Жас мамандарға қамқорлық көрсетіп, шәкірт тәрбиелеуді өмірлік ұстанымына айналдырды. Бүгінде оның тәлімін алған дәрігерлер еліміздің әр өңірінде абыройлы еңбек етуде.
Өмірінің соңына дейін өзі қалыптастырған ұжыммен байланысын үзбей, денсаулық сақтау саласының дамуына ақыл-кеңесін беріп отырды.
Халыққа адал қызмет етуді басты мұрат еткен ардақты азаматтың жарқын бейнесі, өнегелі өмір жолы мен мол мұрасы әріптестері мен шәкірттерінің жүрегінде мәңгі сақталады.
Алмас ӘБІЛПАТТА,
облыстық денсаулық
сақтау басқармасының басшысы
