Қызылорда облысында бүгінгі күнге дейін 31 адам қызылша ауруына шадықты деген күдік туып, оның 11-і нақтыланды, деп хабарлайды ҚазАқпарат тілшісі.Ауруға шалдыққандардың басым бөлігі (77,4 пайызын) – бір жасқа дейінгі және бір жастан асқан балалар. Яғни 24 бөбек осы дертпен науқастанған. Сондай-ақ, 2 жастағы екі бала және 6, 10, 25, 33 жастағы адамдар науқастанған.
«Аурудың алдын алуға иммундау шаралары өз септігін тигізеді. Адам өмірінде 2 рет екпе ала алады. 1 және 6 жаста. Екпе алған адам ауырмауы тиіс. Осы уақытқа дейін біздің аймақта 87 адам егу жұмыстарынан бас тартқан. Соларға түсіндіру жұмыстары жүргізілуде», – деді Қызылорда облыстық қоғамдық денсаулық сақтау департаментінің басшысы Ұлбосын Аханаева.
Айта кету керек, қызылша ауруына шалдыққан науқастардың 84 пайызы осы ауруға қарсы егілмегендер болып табылады. Сондай-ақ, Қызылорда облысында анықталған қызылша ауруының алғашқы 4 жағдайында науқастар өз ауруын Астана, Алматы және Атырау қалаларында науқаспен қарым-қатынаста болуымен байланыстырған. Қалған жағдайлар ауа арқылы, қарым қатынас арқылы таралған.
>>> Біздің Facebook, Instagram парақшаларымыз бен Telegram каналымызға жазылыңыз! <<<
