Парламент Сенатының депутаты, Президент сыйлығының лауреаты, Қазақстанның еңбек сіңірген қайраткері, Қызылорда облысының құрметті азаматы Нұртөре Жүсіптің «Жүректегі жапырақ» атты кітабының таныстырылымы өтті. Айта кетейік, автордың бұған дейін «Біз кімнен кембіз?», «Қазақтың қызы», «Елес пен белес», «Тәуелсіздік лебі: ел мен жер», «Мың құмырсқа және біз» кітаптары жарық көрген.
«Достық үйінде» ұйымдастырылған іс-шараны облыс әкімінің орынбасары, ҚР Президентінің Байқоңыр кешеніндегі арнаулы өкілі Қайрат Нұртай жүргізді. Жиынның кіріспесінде Қайрат Ырзақұлұлы өңірдің руханият саласында атқарылып жатқан ауқымды жұмыстарды саралай келіп, Сыр перзенті, мемлекет және қоғам қайраткері Нұртөре Жүсіптің өмір жолы мен шығармашылығын кеш қонақтарына қысқаша таныстырды.
Қаламгердің оқырман қолына тиген жаңа туындысына аймақ халқының атынан ыстық ықылас білдіріп, облыс әкімі Мұрат Ергешбаевтың арнайы құттықтауын табыс етті.
Алғашқы сөз кезегін алған Сенат депутаттары Бекбол Орынбасаров, Амангелді Есбай кітап авторын шығармашылық еңбегінің жарыққа шығуымен құттықтап, Парламент Сенатының төрағасы Мәулен Әшімбаевтың құттықтауын табыстады.
Қазақстан Жазушылар одағының облыстағы өкілі, халықаралық «Алаш» әдеби сыйлығының иегері Қаршыға Есімсейітова «Жүректегі жапырақ» кітабына жан-жақты шолу жасап, қалам иесінің әр кезеңдегі шығармаларына қатысты ой-пікірін білдірді. Онда жарияланған автордың 15 пен 65 жас аралығындағы өлеңдерінде елге, жерге деген шынайы сүйіспеншілік, азаматтық пен ағалық кезеңнің арасында өмірдің сан алуан соқпағынан түйген салмақты ой-пайымдары оқырманды бей-жай қалдырмайтынын айтты.
Кеште Қорқыт ата атындағы Қызылорда университетінің студенттері автордың өлеңдерін жатқа оқып, кезегі келгенде көңілдерінде жүрген сұрақтарына жауап та алды.
Кештің қорытынды сәтінде бірнеше республикалық басылымдарды басқарған қазақ журналистикасының қайраткері, Қазақстан Жазушылар және Журналистер одағының, ҚР Журналистер академиясының мүшесі, Қазақстанның құрметті журналисі Нұртөре Жүсіп туған жер төрінде өткен жылы жүздесуге қатысушыларға тебіреніспен алғысын білдірді.
«Жүректегі жапырақ» кітабының кіріспесінде автор «Абайдың әрбір қара сөзінде қазақтың болмыс-бітіміне тән терең философиялық ойлар жатыр. Қазір мен Абайдың жасынан асып кеттім. Шынында талай нәрсені көрдік. Бірталай өмірімізді өткіздік. Не көрдік? Не түйдік? Айтарымызды айтқан сияқтымыз… Жазарымызды жазған тәріздіміз…» деп толғанысын жеткізген екен. Кеш барысында да әңгіме ауаны осы төңіректе өрбіді. Сондай-ақ оқырман қауым алдында бірнеше өлеңін оқып, орыс әдебиетінен жасаған аудармалары жайында ой қозғады. Осындай жыр шумақтарының біріне назар салсақ:
Мақтан үшін жазғам жоқ өлеңді мен,
Түсімде де тәтті өлең
көрем кілең.
Не жазсам да халқыма
арнап жаздым,
Кір келтірмей өлеңге,
өлем білем…
Иә, Жаратқанның жазуымен қолына қалам алған ақын-жазушыға ең басты керегі – ақыл-ойдың тереңдігі, парасат-пайымның кемелдігі. Осы тұрғыдан келгенде, қаламгер шығармаларындағы толғанысты ой, тұжырымды пікір адами тіршіліктің ақ-қарасын тереңірек тануға жетелейді.
Ғазиза ӘБІЛДА,
«Сыр бойы»
