Облыс әкімі Нұрлыбек Нәлібаев Жаңа жыл қарсаңында медицина мекемелеріне 26 жаңа санитарлық автокөліктің кілтін салтанатты түрде табыстады. Сондай-ақ аймақ басшысы алдағы уақытта да Сыр медицинасының ілгерілеуіне жан-жақты қолдау көрсетілетінін айтты.
– Мемлекет басшысы қоғамның тұрақты дамуы жолындағы ұлт саулығының маңызына ерекше мән беріп келеді. Медициналық қызметтің қолжетімділігін, денсаулық сақтау саласы инфрақұрылымын одан әрі жетілдіру үшін облыста да кешенді шаралар қабылдануда. Биыл медицина мамандарына, ардагерлеріне құрмет көрсетіліп, жыл жағымды жаңалықтарымен ерекшеленді. Республикаға белгілі дәрігер-хирург Абдулла Шүленбаев Қызылорда облысының Құрметті азаматы атағын алса, дәрігер-нейрохирург Шынжырбай Оразмаханұлы «Құрмет» орденімен наградталды. Төрт дәрігер республикалық «Үздік маман» конкурсының жеңімпазы атанып, 2 дәрігер Астанадағы Медицина қызметкерлері күніне орай өткен мерекелік шарада «Алтын шипагер» марапатын иеленді. Денсаулық сақтау саласының ардагері Ернияз Омарұлына ескерткіш-бюст орнатылды. Бұл – өңірде жасалған жұмыстардың бір бөлігі ғана, – деді Нұрлыбек Машбекұлы.
Салтанатты іс-шарада облыстағы денсаулық сақтау ұйымдарына 512,5 млн теңгеге алынған 25 жаңа санитарлық автокөлік және құны 43,1 млн теңге тұратын мүгедектігі бар балаларды тасымалдау үшін арнайы жабдықталған автобус табысталды. Сонымен қатар Денсаулық сақтау саласының үздігі, Қызылорда қаласының құрметті азаматы Сағындық Шәмшиев әріптестерін құттықтап, ізгі тілегін арнады. Рәсімде бірқатар үздік қызметкер марапатталды.
Былтыр 45 жедел жәрдем көлігі алынып, облыстық жедел жәрдем стансасы 100 пайыз қамтамасыз етілген болатын. Биыл да денсаулық сақтау ұйымдарын санитарлық автокөліктермен қамтамасыз ету жұмыстары жалғасын таппақ. Облыста Мемлекет басшысының бастамасымен қолға алынған «Ауылдық денсаулық сақтауды жаңғырту» ұлттық жобасы аясында жалпы құны 11 млрд теңгені құрайтын 27 нысан құрылысын салу жоспарланған. Жуырда аймақтың 7 ауданында 15 дәрігерлік амбулатория пайдалануға берілді. Қалған нысандардың құрылысы биыл жүргізілмек.
>>> Біздің Facebook, Instagram парақшаларымыз бен Telegram каналымызға жазылыңыз! <<<
