Қазақстанда 17 000 адам алты немесе одан да көп пәтерге иелік етеді. Мұны Отбасы банктің бас директоры Ләззат Ибрагимова айтты. Бұл туралы Stan.kz ақпарат агенттігі хабарлайды.
Елде ғимараттарда 6,2 миллион пәтер және 2,3 миллион жеке тұрғын үй бар.
«78%-ы тек бір ғана үйге иелік етеді. 5,5 миллион қазақстандық жылжымайтын мүлікке меншік құқығын тіркеген. Яғни, олар қазір үй иелері. Бізде әкімдіктерде жалға берілетін тұрғын үй қоры бар, бірақ ол аз. 934 000 қазақстандық екі пәтерге иелік етеді. 219 000 адам үш пәтерге иелік етеді. Орта таптың мұндай деңгейде болғанына қуана аламыз”, – деді Ибрагимова.
Шамамен 82 000 адам төрт-бес пәтерге иелік етеді. Ал 17 000 адам алтыдан онға дейін пәтерге иелік етеді.
Оның айтуынша, тұрғын үйге деген сұраныс көбінесе Қазақстандағы демографиялық жағдайға байланысты. Азаматтардың орташа жасы небәрі 29 жас болған елде алдағы бес жылда жоғары сұраныс күтіледі. Дегенмен қазір шамамен 1,08 миллион ересек қазақстандық баспанасыз қалып отыр.
