Құрметті жерлестер!
Сіздерді 7 мамыр – Отан қорғаушы күнімен шын жүректен құттықтаймын!
Отан – қасиетті ұғым. Ел қорғаны – ер парызы. Отанға адал, елге жанашыр, отбасына тірек болу – әрбір азаматымызға қасиетті борыш.
Халықтың тыныштығы мен бейбіт тірлігінің сақшылары үшін ар-намыс пен ерлік, батырлық пен батылдық әрі абырой, әрі сенім.
Жер көлемі жөнінен аумағы үлкен, шекарасы шегенделген, халқы біртұтас, жасампаз жолы айқындалған Қазақстанның ұлттық егемендігін нығайтуға кәсіби армиямыздың әлеуеті жоғары.
Ел Президенті, Қарулы Күштердің Жоғарғы Бас қолбасшысы Қасым-Жомарт Кемелұлы Тоқаевтың тапсырмасына сәйкес Қазақстан армиясын реформалау бойынша кешенді жұмыстар жүргізіліп келеді.
Отан қорғаушылар – патриотизмнің, ар-намыстың айқын айнасы.
Бұл мереке баршамыздың қайсарлық рухымызды, елдік асыл мұраттарымызды жаңғырта береді.
Сіздерге істеріңізге табыс, отбасыларыңызға амандық, дендеріңізге саулық, бақытты ғұмыр тілеймін.
***
Құрметті жерлестер!
Қадірлі соғыс ардагерлері мен тыл еңбеккерлері!
Сіздерді Ұлы Жеңістің 78 жылдық мерекесімен шын жүректен құттықтаймын.
Кешегі қаһарлы жылдардың қаһармандық жолы жұртшылықтың мәңгі жадында. Бұл мереке – Отан қорғаудағы өшпес ерліктің, өлшеусіз даңқтың, еңселі елдіктің рухы.
Бүгінгі тәуелсіздік тұғырының берік, еңсеміздің биік болуы, өңіріміздің өркендеуі мен еліміздің гүлденуі – осынау мерекенің жемісі.
Жас ұрпақ аға буынның батылдық жолынан өнеге алып, бой түзейді. Талайлы тарихымыздың тарландары жасаған жасампаз ерлік мәңгілік елдің ұмытылмас асыл мұрасына айналды.
Бейбіт өміріміз бен бақытты болашағымыз үшін майданда да, тылда да жанқиярлықпен күреске түскендердің барлығы айрықша құрметке ие, қаза тапқандардың рухына тағзым етеміз. Ардагерлерді ардақтау, қазыналы қарттарымызға қамқорлық жасау – басты борышымыз!
Бүгінде аймағымызда 6 соғыс, 2048 соғыс ардагеріне теңестірілген тыл ардагері бар. Ұлы Жеңісті жақындатқан көзі тірі майдангерлерге республика тарапынан қаржылай қолдаулар көрсетілуде.
Жеңіс – жетістіктерге жігерлендіреді, жанымызға қуат береді, қиындықтарды жеңіп, алға ұмтылуымызға көмектеседі.
Сіздерге және отбасыларыңызға ізгілік пен игілік тілеймін! Мерей үстем, ардагерлеріміз аман болсын!
>>> Біздің Facebook, Instagram парақшаларымыз бен Telegram каналымызға жазылыңыз! <<<
