Қызылорда қаласында Кеңес Одағының батыры Тәйімбет Көмекбаев атындағы грек-рим күресінен халықаралық турнир мәресіне жетті. Оған әлемнің оннан астам мемлекетінен балуандар келді. Дүбірлі додада он салмақ дәрежесі бойынша жүлделер сарапқа салынды.
Қазақстан Республикасының Грек-рим, еркін және әйелдер күресі федерациясының вице-президенті Дәурен Жабасовтың айтуынша, турнирге әлемнің танымал балуандары келді. Олардың қатарында Бразилия, Түркия, Ресей, Өзбекстан, Қырғызстан спортшылары бар. Сондай-ақ елімізден ұлттық құрама сапында сынға түсіп жүрген Ержет Жарылқасын, Әлімхан Сыздықов, Айдос Сұлтанғали, Олжас Сырлыбай сынды балуандар бозкілем үстінде жанкүйер көңілінен шығарлық белдесулер өткізді.
– Өздеріңіз білетіндей, грек-рим күресі олимпиадалық спорт түріне жатады. Сондықтан ұлттық құрама мүшелері үшін мұндай жарыстарға қатысудың маңызы зор. Осыған байланысты дүниежүзілік додаларда еліміздің намысын абыроймен қорғап жүрген балуандар да турнирге қатысуға шешім қабылдады. Бұл олардың тәжірибесін арттыруына өз септігін тигізеді. Өйткені, өзге елдерден келген спортшылар арасында да Әлем және Олимпиада төрінде атой салған саңлақтар аз емес. Халықаралық турнирге Қазақстанның бірқатар облысы жеке команда ретінде балуандар жіберді. Ұлттық құрама бапкерлері әрбір белдесуді жіті қадағалайды. Өзін жақсы қырынан таныта білген жігіттер алдағы уақытта еліміздің атынан сан алуан сайыстарға қатысуға мүмкіндік алады, – деді Д.Жанасов.
Қызылордалық жанкүйерлер жерлесіміз Айдос Сұлтанғалидың сайыстарын жіті қадағалады. 2018, 2022 жылғы Әлем чемпионатының қола жүлдегері бұл жолы да әрбір белдесуін сәтті өткізе білді. Ол финалда Жетісу облысынан келген Ғалым Қабдунасаровтың осал тұсын тауып, жеңіс тұғырына көтерілді.
– Сыр өңірінде өткен турнирде жерлестерімді жеңісіммен қуантқым келді. Әрине, біз әр жарысқа тыңғылықты әзірлік жасаймыз. Өйткені, әрбір жетістікке үлкен еңбекпен қол жеткізуге болады. Қарсыластарым да осал емес. Бозкілем үстінде олардың әлсіз тұсын бақылап, ұпай қорын молайтуға тырыстым. Нәтижесінде өз салмағымда чемпиондық атаққа қол жеткіздім. Енді алдағы жарыстарға дайындықты жалғастыратын боламын, – деді Айдос Сұлтанғали.
Халықаралық турнирде қызылордалық Алпамыс Дастанбек, жамбылдық Ержет Жарылқасын, Мейрамбек Қордабай, астаналық Мерей Маулитханов, ресейлік Әділет Төлеубаев, түркиялық Эмребасар Юнус, Бозкурт Фатих, беларусьтік Радик Кулиев), қырғызстандық Афтандил Таалайбекуулу чемпион атанды.
«СБ» ақпарат
>>> Біздің Facebook, Instagram парақшаларымыз бен Telegram каналымызға жазылыңыз! <<<
