Қазақстан теннис құрамасы Аустралияның Брисбен қаласында United Cup командалық турнирінде өнер көрсетіп жатыр, деп хабарлайды ҚазАқпарат.
Қазақстан теннис федерациясынан мәлім еткеніндей, қазақстандықтар алғашқы матчын Швейцария құрамасымен өткізуде.
Бүгін еліміздің бірінші ракеткасы, команда капитаны Александр Бублик кортқа шығады. Ол Швейцарияның аса тәжірибелі ойыншысы Стэн Вавринкамен сынға түседі. Ойын шамамен Астана уақытымен 13.30-да басталады. Жібек Құламбаева әлемнің 35-ракеткасы Жиль Тайхманмен шеберлік байқасады. Ең соңғы бәсеке – аралас жұпта Александр Бублик пен Юлия Путинцева Стэн Вавринка – Белинда Бенчичпен ойнайды.
Жарыстың бірінші күні қазақстандықтар үшін сәтсіз болды. Юлия Путинцева әлемнің 13-ракеткасы, Токио олимпиадасының чемпионы Белинда Бенчичке есе жіберді – 6:7(0:7), 3:6. Бірінші сетте қазақстанды теннисші 4:2 есебімен алда тұрды. Есеп 5:4 болған мезетте де екі сет-пойнтты пайдалана алмады. Екінші партияда да 2:0 есебімен алға шыққанымен, жеңіліс тапты.
Тимофей Скатов әлемнің 56-ракеткасы Марк-Андре Хуслерге тартысты матчта жол берді – 6:4, 3:6, 3:6.
Осылайша, Швейцария 2:0 есебімен алда тұр.
Еске сала кетейік, бұдан бұрын теннистен Қазақстан құрамасы алғаш рет өтетін United Cup турнирінде бақ сынайтынын жазған болатынбыз.
Сондай-ақ Александр Бублик Елена Рыбакинаның Уимблдондағы жеңісін жоғары бағалады.
>>> Біздің Facebook, Instagram парақшаларымыз бен Telegram каналымызға жазылыңыз! <<<
