Қызылордада тілсіз жау тыйылмай тұр. Коронавирус пандемиясы кезінде карантин талабын бұзғандарды анықтауда алғашқыдағыдай қарқын жоқ. Бұл мәселелер облыс әкімінің орынбасары Серік Ахмет төрағалық еткен мәжілістің өзегі болды.
Мамандар өрттің шығу себебін көбіне тұрғындардың өзіне әкеп тірейді. «Өйткені қауіпсіздік талаптарын сақтамайды» дейді. Негізгі себеп ретінде электр желісінің тұйықталуы, үйдегі пеш пен газ қондырғыларындағы ақау айтылып жүр.
– Жылу беру маусымы басталғалы тұрғын үй секторларында 167 дерек тіркелді. Қаза тапқан 4 адамның 3-і, жарақат алған 2 адамның 1-і – бала, – деді облыс әкімінің орынбасары.
Жауапты сала өкілдерінің шұғыл жиналуына бір жағынан күні кешегі қайғылы жағдай себеп болды. Қызылорда қаласының «Қызылжарма» қыстағындағы үйлердің бірінен шыққан өрт 1 жастағы сәбидің өмірін жалмады. Құтқарушылар жалынға оранған орыннан әйелді және оның 4 қызын шығарып үлгерген.
Облыстық төтенше жағдайлар департаменті бастығының міндетін атқарушы Руслан Қайрақбаев департамент қызметкерлерінің тұрғындарға сақтық шараларын түсіндіруінің кемі жоқ екенін жеткізді.
– Көмірқышқыл газын анықтайтын 3838 құрылғы сатып алынып, оның 3723-і көпбалалы және қалтасы көтермейтін отбасылардың үйлеріне орнатылды. Соның арқасында 3 отбасының қайғылы жағдайдан аман қалғанын айтпасқа болмайды, – деді ол.
Төтеншеліктердің аяғына оратылатын кедергі аз емес. Мысалы, кейбір аулалар мен үйлердің кіреберістерінде темір плита, бетон қоршау тұр. Қызылорда қаласындағы Сырдария өзенінің сол жағалауындағы тұрғын үйлердің аулаларында су көздері жоқ. Көше бойында өрт гидранттары болғанымен, іске алғысыз.
Күн тәртібіндегі келесі мәселе бойынша облыстық санитарлық-эпидемиологиялық бақылау департаментінің басшысы Динара Жаңабергенова карантиндік шектеудің сақталуын бақылайтын мониторинг топтарының жұмысын сынға алды.
– Жыл басынан бері осындай 24 топ 1060 нысанда рейдтік тексеру жүргізді. Нәтижесінде Қызылорда қаласы мен Сырдария, Жалағаш, Жаңақорған аудандарында отбасылық-мерекелік шара жасаудың 8 дерегі тіркелді. Қалған ауданда заңбұзушылықтың анықталмауы күмәнді, – деді департамент басшысы.
Кафе, мейрамхана, компьютерлік клубтарда – 27, балабақша мен мектептерде 9 дерек тіркелді. 38 жеке, 4 заңды, 2 лауазымды тұлға әкімшілік жауапкершілікке тартылды.
Мәжіліс қорытындысында облыс әкімінің орынбасары құзырлы орындарға өрттің салдарымен емес, себебімен күресуді тапсырды. Ал мониторинг топтарының жұмыс қарқынын күшейту керек. Өйткені Денсаулық сақтау министрлігі алдағы айда коронавирустың өршуі мүмкін екенін болжап отыр.
>>> Біздің Facebook, Instagram парақшаларымыз бен Telegram каналымызға жазылыңыз! <<<