Шиелі аудандық мәдениет үйінде ақын Бекзат Сәдібекұлының «Ана, сендей ешкімді сүйгенім жоқ» деп аталатын шығармашылық кеші және осылай аталатын жаңа кітабының тұсаукесері өтті.
Шығармашылыққа жаны құмар шиеліліктер көрермен залына лық толды. Әдеби айналымда әлі аты танылмаған ақынның туған жердегі беделін осы көріністен-ақ байқадық.
Себебі кештің бастауы мен жабылуындағы ақын сөзіне жазылған «Ақ ордам – Шиелімсің» әні Шиелінің әнұранына айналып кеткендей туынды екен.
Кештің шымылдығын аудан әкімінің орынбасары Болат Смағұлов ашып берді. Мұнан соң белгілі өнер өкілдері – оралдық ақын Асантемір Қаршыға, жерлестеріміз Серік Ыдырысов, Дүйсенбек Аяшұлы, Жетес Жолдасбаев, Серік Әлшоразаев, т.б. сөз сөйлеп, жаңа кітаптың көк желегін қиды.
Бұл шараны өлең тойына айналды десе де болады. Кеште ақын сөзіне жазылған Үкітай Ерниязов, Жомарт Ахметов, Жарасхан Төлебай секілді жергілікті композиторлардың бірнеше жаңа әндерінің де тұсауы кесіліп, шырқалды.
Ақын мұндай тамаша өнер салтанатын өткізу үшін құзырлы орындарға қолқа салмаған, оны ұйымдастырып, қаржылық көмек көрсетуге Үкітай Ерниязов, Әлфараби Бекарысұлы, Құрманбек Боранбаев, Нұрбол Самат секілді достары, өнер жанашырлары қолұшын беріпті.
Осы күні жұртшылық Шиеліде тағы бір талантты ақынның жүргенін таныды.
«СБ» ақпарат
>>> Біздің Facebook, Instagram парақшаларымыз бен Telegram каналымызға жазылыңыз! <<<
