Қазақстан халқы Ассамблеясының 30 жылдық мерейтойы аясында және БАҚ қызметкерлерінің кәсіби мерекесі қарсаңында облыстық ҚХА жанындағы Журналистер клубының бастамасымен алғаш рет «TWO STARS» («Екі жұлдыз») атты ән-шоу байқауы өтті.
Шарада сөз алған облыстық қоғамдық даму басқармасының басшысы Руслан Каюпов байқаудың мәні мен маңызына тоқталды. Ол бұл байқауды шығармашыл жандардың ынтымағын айқындайтын жарқын алаң ретінде сипаттап, журналистердің тек ақпарат таратушы ғана емес, рухани байланыстың алтын көпірі екенін атап өтті. Сондай-ақ облыстық ҚХА жанынан құрылған Журналистер клубының жұмысына айрықша тоқталды.
Шығармашылық пен журналистиканы ұштастырған ерекше жобада өңірге танымал журналистер жұптасып, бір сахнада өнер көрсетті. Байқаудың басты мақсаты – этносаралық татулықты насихаттау, шығармашылық ынтымақтастықты дамыту және мәдени байланыстарды нығайту.
Шоу екі кезеңнен тұрды. Шараға бес жұп қатысты. Алғашқы бөлімде қатысушы жұптар бірлік, достық, татулық тақырыбындағы әндерді орындап, арнайы бейнероликтер арқылы өз жобаларын таныстырды. Екінші кезеңде еркін тақырыптағы ән мен сахналық қойылымдар ұсынды.
Нәтижесінде бас жүлдені облыстық «Qyzylorda» телеарнасының жаңалықтар жүргізушісі Талант Айымбетов пен бағдарламалар бөлімінің тілшісі әрі жүргізушісі Аружан Саруарбек жеңіп алса, жүлделі бірінші орын «Ақмешіт жастары» газетінің бас редакторы Абзал Жолтерек пен «Qyzylorda-news.kz» агенттігінің видео-контент шебері Қуаныш Мұстафаевқа бұйырды. Ал екінші орын «Qyzylorda» телеарнасының сарапшы редакторы Дәулетхан Ақайдаров пен жүргізуші редакторы Әйгерім Нажмадинқызы иеленді. Арнайы жүлде – «Өңірлік коммуникациялар қызметінің» қызметкерлері Динар Рахман мен Жания Төребековаға және «Кызылординские вести» газетінің жауапты хатшысы Ерхан Ақынов пен тілші Альфия Гавычеваға табысталды.
Байқау барысында «Ассамблея жастары» ұйымының белсенділері де ән мен биден шашу шашып, шара көрігін қыздырды.
Кеш соңында жеңімпаздарға дипломдар мен бағалы сыйлықтар табысталды. Сондай-ақ қатысушы жұптар бірлесе «Екі жұлдыз» әнін орындап, Сыр аспанын әсем әнмен көмкерді.
Мейрамгүл
ДАУЫЛБАЙҚЫЗЫ,
«Сыр бойы»
