«Нағыз шебер ғой» десе де мән бермегенбіз. Бұл заманда өз ісіңе ыждағатты болмасаң, әп-сәтте шетке шығып қалуың ғажап емес. Сондықтан жұмысыңа пысықтық керек, жұрт талабына сай әрекет ете білсең ғана кәсібің өрге жүзер. Бұл да сондай таптырмас маманның бірі болар дегенбіз. Оуу, ондайлар көп емес пе еді?! Сөйттім-дағы да тілдесуге уақыт жоғалтқым келмеді. Бірақ «ол ауданда кім басшы болса, соның төбесін бірінші көретін адам» дегесін еріксіз бұрылдық. Қызық қой енді. Шенеунік біткенге ұнап жүрген қай шаштараз бұл?!
Жаңақорған жеріндегі түрік азаматы Латуша Байсаловпен осылай жолығысып қалдық.
– Кеңестік кезеңде осы ауданда бірінші хатшы болған Ахметжан Жанпейісовтің шашын алғанмын. 1975 жылы еді. Содан бері қарай аудандағы бірінші хатшылар мен әкімдердің шашын алып келеміз. Тіпті, қазіргі басшының да шашын аламыз. Ал ауыл әкімдері мен басқа да жауапты қызметкерлердің шашын алу бізге үйреншікті жайт. Былайғы жұрттың шашын әсемдеу екібастан ғой, – дейді Латуша Байсалов.
Бозбала күнінде Фатима есімді шаштараздан өз бетінше үйренген Латушаның өмір жолы Жаңақорғанмен байланысты. Оның ата-анасы 1944 жылы сталиндік репрессияға ұшырап, осында тұрақтаған. Содан бері Жаңақорғанның суын ішіп, құмында ойнаған Латуша қазақ арасында ер жеткен. Шеттен келсе де, шектеу көрмеген шаштараз «өзіміз түрік болғанмен, туған жерім қазақ арасы, сондықтан олар маған ағайын-туған іспеттес» дейді.
– Інімнің баласы Мәмедке үйреттім осы өнерді. Ол да бөлек бизнесін бастады. Иә, шаш – адам көркі. Бір қарағанда оңай жұмыс болып көрінуі мүмкін. Бірақ шын мәнінде өз қиындығы бар. Оның бүге-шүгесіне дейін мән береміз, тіпті клиентпен сөйлесіп, тілін табуда жылдар бойғы тәжірибеге сүйеніп келемін. Қанша шебер болғаныңмен келген адаммен жылы сөйлесе алмасаң, өзіңе, жұмысыңның нәтижесіне нұқсан келеді. Шашты бүлдірмей, кісі көңілінен шығатындай етіп қиып беру – зор жауапкершілік. Әлгінде айттым ғой, бұрынғы басшылардан бүгінгі әкімдерге дейін шаш алуға келгенде маған сенеді. Бәрі сол, ұқыптылыққа байланысты шығар. Осы кәсіппен айналысқаныма биыл 46 жыл болыпты. Былтыр ғана зейнетке шықсам да, әлі қолымнан қайшы-тарағым түскен жоқ, – деп күлді ол.
Латуша Байсалов аудан бойынша былтырғы жылдың қорытындысымен «Халық қызметшісі» номинациясымен марапатталды. Лайықты ғой. Расымен, ол осы жерден табан аудармай, жарты ғасыр жұртқа қызмет жасап келеді.
Ержан ҚОЖАС,
«Сыр бойы»
Жаңақорған ауданы
>>> Біздің Facebook, Instagram парақшаларымыз бен Telegram каналымызға жазылыңыз! <<<