Шартарапты шарлаған коронавирус індетімен күресте ақ халаттылар мыңдаған адамның өмірін құтқарып қалды. Олардың арасында халық денсаулығын сақтау жолында жүріп, ауру жұқтырып дүниеден өткендер бар. Кеше олардың еңбегін ұмытпау, ұрпаққа насихаттау мақсатында Қызылорда медициналық жоғары колледжінің жанынан ескерткіш ашылды.
Медицина қызметкері күні мерекесі қарсаңында өткен белгінің ашылу салтанатына облыс әкімінің орынбасары Балжан Шәменова қатысты. Шарада ол медицина қызметкерлерінің ел денсаулығын сақтау жолында атқарған қызметі өте ауқымды екенін, медициналық құрал-жабдықтар қанша жетілгенімен, білікті мамансыз ештеңеге жарамайтынын, кәсіби деңгейі жоғары дәрігерлердің арқасында аурушаңдық біршама төмендеп тұрғанын атап өтті.
Сондай-ақ, жиынға сала ардагерлері Тұрғанбай Маханов, Рая Көзденова қатысып, бұрын да халқымыз сан түрлі сыннан өткенін айтты.
– Бір жақсысы, қазір індетке қарсы ем табылды. Бірақ арақашықтықты сақтау, маска тағу сынды қауіпсіздік ережелерін орындауға міндеттіміз. Сонда ғана аурудың алдын алуға болады. Қазақта «Өткендерді еске алған, өскендіктің белгісі» деген сөз бар. Халық денсаулығы жолында күрескен әріптестерімізге арналған ескерткіш үшін медицина қызметкерлері атынан алғыс білдіремін, – деді Тұрғанбай Маханов.
Айта кету керек, Сыр өңірінде коронавируспен күреске жұмылған 19 медицина қызметкері қайтыс болды.
Індетпен күрестің алғы шебінде жүріп өмірден өткен дәрігерлерге арнап өз қаражатына ескерткіш орнатқан кәсіпкер, «Q-Med» медициналық орталықтарының директоры – Раушан Базарбай.
– Мүсін пандемия кезіндегі әрбір медицина қызметкерінің жанкештілігін, кәсібіне адалдығын көрсетеді. Ескерткіштің медициналық білім ордасының ауласында орналасуында да үлкен мән бар. Өйткені бұл мамандықты таңдаған әр студент ел алдындағы антына берік болуы керегін осы арқылы бойына сіңіреді деген ойдамын, – деді Раушан Базарбай.
Ескерткіштің авторы – суретші Әлібек Қойлақаев. Науқастарды емдеуде қажыған, өзі де дертке шалдыққан, бірақ сонда да әлемді құтқаруға соңғы демі қалғанша күрескен медицина қызметкерін бейнелеген.
Шараға марқұм болған медицина қызметкерлерінің туыстары да қатысып, ескерткішке гүл шоғын қойды.
Айдана Жұмадинова,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
