Израиль Түркиямен қарым-қатынасының қайта қалпына келгенін хабарлады. Израиль премьер-министрі Яир Лапид кеңсесі Израиль мен Түркияның елшілері мен бас консулдарды қайта тағайындау туралы өзара шешім қабылдағанын мәлімдеді. Мәлімдемеде бұл шешімнің Лапидтің өткен маусым айында Анкараға ресми сапары кезінде президент Режеп Тайып Ердоғанмен кездесуінде қабылданғанын алға тартты.
Премьер-министр Лапид «Түркиямен қарым-қатынастың қайта жандануы Израиль азаматтары үшін аймақтық тұрақтылық пен экономикалық бағыттағы жеңіс» деп бағалады. Израильдің дүние жүзіндегі ұстанымын нығайтуды жалғастыратындарын айтқан ол Түркиямен дипломатиялық қарым-қатынастың толығымен қайта жандану ісі бір жыл бұрын басталған «жақындасу» процесінің нәтижесі екенін атап өтті.
Мәлімдемеде бұл үдерістің Израиль президенті Ицхак Герцогтың Анкараға сапарынан бастау алғаны ерекше аталды. Президент сапарынан соң екі елдің сыртқы істер министрлері Иерусалим мен Анкараға өзара сапар жасаған еді. Естеріңізге сала кетейік, Израиль президенті Ицхак Герцогтың Түркияға өткен наурыздағы сапары он жылдық үзілістен кейін Израильден президенттік деңгейде Түркияға жасалған алғашқы ресми сапар болды.
Ал Түркия сыртқы істер министрі Мевлүт Чавушоғлу Анкарада Қырғызстан сыртқы істер министрі Ерлан Әбділдаевпен кездесуінен кейін өткізілген ортақ баспасөз мәслихатында осы мәселеге қатысты мәлімдеме жасап: «Израильмен жаңа үдеріс басталды. Біз авиация саласында ынтымақтастық келісіміне қол қойдық. Қарым-қатынасты қалыпқа келтіру барысында қабылданатын шешімдердің қатарында өзара елшілер тағайындау ісі де бар. Біз Тель-Авивке елші тағайындауға шешім қабылдадық», деп мәлімдеді.
Израильмен қарым-қатынастың қалыпқа келуі Түркияның Палестинаға қатысты ұстанымын өзгертпейтінін атап көрсеткен Чавушоғлу: «Палестина, Иерусалим және Газаның құқықтарын қорғауды жалғастырамыз, сонымен қатар бұл ұстанымға қатысты хабарларымыз елшілер арқылы тікелей Тель-Авивке жеткізілуі маңызды», деді.
Сондай-ақ Түркияның Израильге елші тағайындау шешіміне қатысты АҚШ-тың Анкарадағы елшілігі өз пікірін білдірді. Елшілік Twitter-дегі парақшасында: «Анкарадағы АҚШ елшілігі ретінде Түркия мен Израильдің екі ел арасындағы қарым-қатынасты қалыпқа келтіру аясында өзара елшілер тағайындайтыны туралы хабарға қуаныштымыз», деп жазды.
Осы мәселеге қатысты Израиль президенті Ицхак Герцог та Twitter парақшасында: «Түркиямен жан-жақты дипломатиялық қарым-қатынастардың қайта басталуын құптаймын. Өткен жылы басталған қарым-қатынастарды қалыпқа келтіру үрдісі экономикалық қарым-қатынастарды жандандырып, Израиль мен түрік халқы арасындағы өзара туризм мен достықты нығайтады», деген ойын білдірді.
Естеріңізге сала кетейік, Израиль қауіпсіздік күштері 2010 жылы Газаға көмек тасымалдаған «Мави Мармара» кемесін басып алып, соның салдарынан 10 түрік азаматы қаза тапқан еді. Бұл оқиға аймақта ұзақ жылдар бойы одақтас болған екі елдің қарым-қатынасын нашарлатып жіберді. 2016 жылы екі ел арасындағы қарым-қатынастарды жандандыру үшін қадамдар жасалғанымен, 2018 жылы АҚШ елшілігін Тель-Авивтен Иерусалимге көшіруімен басталған Газа дағдарысында қарым-қатынас тағы да үзіліп, екі ел де елшілерін тағайындаудан бас тартқан еді.
>>> Біздің Facebook, Instagram парақшаларымыз бен Telegram каналымызға жазылыңыз! <<<
