Жалағашта күріш егістігі 600 гектарға қысқарды

710

0

Жалағаш ауданында биыл 19 800 гектарына күріш дақылының тұқымы себіліп, толық суға бастырылды. Су тапшылығына байланысты күріш дақылы 600 гектарға қысқартылды. Бұл туралы Өңірлік коммуникациялар қызметінің ақпарат алаңында Жалағаш ауданы әкімінің орынбасары Алтынбек Дәрібаев баяндады.

– Қазір жоспарланған жаздық бидай, мақсары, жаңа жоңышқа дақылдары 100 пайыз орналастырылып, күздік бидай, ескі жоңышқа дақылдары күтімге алынды. Сонымен қатар, межелген 500 га картоп, 1000 га көкөніс және 1200 га бақша дақылдары толық егілді. Биыл жылдағыдан күріш дақылының көлемі қысқарып, суды аз қажет ететін 93 га жаздық бидай, 72 гектар жүгері, 30 гектар жаздық арпа, 443 га мақсары, 445 га жаңа жоңышқа дақылдары орналастырылды, – деді Алтынбек Дәрібаев.


Ауданда шаруашылық басшылары егілген егінді сумен қамтамасыз ету үшін 53 дана насос қондырғысын іске қосты.

– Облыстық бюджеттен 4 дана насос қондырғысы сатып алынатын болады. Қазіргі таңда, Жаңаталап және Шаменов ауылдық округтеріне насос қондырғылары жеткізілді. Ағымдағы жылдың 20 маусымына дейін тағы 2 насос жеткізіледі, – деді облыстық табиғи ресурстар және табиғатты пайдалануды реттеу басқармасы басшысының орынбасары Жұлдызай Айтжанова.


Егістікке тіршілік нәрін тұрақты беру үшін магистралды каналдардан су алу кестесі жасалды.

– Жалағашта жоспар бойынша секундына 40 текше метр су алу керек болса, бүгінде 30 текше метр келуде. Осыған орай, барлық аудан әкімдігі мен шаруашылық арасында келісім жасалып, график бекітілді. Ұзақтығы 5-6 күннен аспайтын болады. Кезекке қойған кезде мысалы, оң тармаққа су берілетін болса, сол тармақты нөлге дейін жауып тастамайды. Тек су деңгейі төмендейді, – деді «Қазсушар» РМК Қызылорда филиалының су шаруашылығы нысандарын пайдалану бөлімінің басшысы Айдос Асанбаев.

 


>>> Біздің Facebook, Instagram парақшаларымыз бен Telegram каналымызға жазылыңыз! <<<