«Өнер орталығында» ҚР Мәдениет қайраткері, әнші, термеші Бибажар Маханбетқызының 70 жас мерейтойы аясында «Қызыма» атты жеке шығармашылық кеші өтті. Концерттің өтуіне облыс әкімдігі қолдау танытты.
Кешке арнайы қатысқан облыс әкімінің орынбасары Мейрамбек Шермағанбет өнер иесіне аймақ басшысының құттықтауын табыстап, ұлттық үрдіске сай сый-құрмет көрсетті.
Мерейтойлық кеште қазақ эстрадасының жұлдызы, танымал әнші, «Аппақ гүлдер», «Қош, махаббат», қырғыз әні «Бегімайдың жыры» (дуэт) әндерімен көрермен көңілін жаулаған өнер иесінің қызы Ақбота Керімбекова, белгілі жыршы-термеші Мейрамгүл Орашева, әнші-сазгер Индира Елубаева, сондай-ақ «Ақмешіт» фольклорлық ансамблі, «Томирис» және «Ai-Aru» би ансамбльдері өнер көрсетіп, көпшіліктің қошеметіне бөленді. Кеш тізгінін ұстаған танымал радиожүргізуші Гүлмира Нәлібай рухани әсері мол іс-шараның мазмұнын таныта түсті.
Концерттің қорытынды сәтінде сөз алған мерейтой иесі Бибажар Маханбетқызы халықтың төл өнеріне қолдау танытқан азаматтарға, жалпы Сыр жұртшылығына алғысын айтты.
Жерлесіміз, дәстүрлі әнші Бибажар Маханбетқызының жеке концерті Жаңақорған, Шиелі аудандарында жалғасын тауып, аудан әкімдері мерейтой иесіне сый-құрмет көрсетті. Жас ақындар арнау жырларын оқып, дәстүрлі өнерге деген құрмет, ілтипатын білдірді.
Концерттер барысында әншінің жарты ғасырға жуық еңбегі ел алдында қайта көрініс тауып, көрерменнің ыстық ықыласына кенелді.
«СБ» ақпарат
