Қызылордада «Денсаулық сақтау жүйесіндегі жас мамандар: медициналық колледждердің халықаралық диалогы» атты халықаралық ғылыми-тәжірибелік конференция өтті.
Медициналық білім беру мен денсаулық сақтау саласындағы өзекті мәселелерді талқылауға арналған іс-шараға Латвия, Беларусь, Түркия, Өзбекстан, Қырғызстан, Әзербайжан, Тәжікстан елдерінен медициналық оқу орындары мен ұйымдардың өкілдері қатысты.
«Өнер орталығында» өткен конференцияның ашылу салтанатында облыс әкімінің бірінші орынбасары Данияр Жаналинов қатысушыларға сәттілік тіледі.
Сонымен бірге ҚР ДСМ ғылым және адам ресурстарын дамыту департаментінің басқарма басшысы Гүлмира Алмағамбетова, AMANAT партиясы Қызылорда облыстық филиалының төрағасы Жандос Базартай, Y-PEER өңірлік үйлестірушісі, UNFPA Kazakhstan өкілі Надежда Хе, Білім беру қорының президенті, Global Sapa халықаралық академиясының құрылтайшысы Тілектес Шинчужинова сөз сөйледі.
Медицина саласындағы заманауи технологиялар мен емдеу-диагностикалық әдістердің қарқынды дамуы кәсіби диалогты нығайтуды, білім беру үдерісін жаңғыртуды және халықаралық тәжірибе алмасуды талап етеді. Осы орайда конференция болашақ медицина мамандарының кәсіби және ғылыми әлеуетін біріктіру арқылы халықаралық ынтымақтастықты нығайту, медициналық білім берудегі инновациялық идеялар мен цифрлық технологияларды ілгерілету, қоғам игілігі үшін мейірімділік пен жауапкершілік құндылықтарын дәріптеу мақсатында ұйымдастырылған.
Жиында сондай-ақ AMANAT партиясы облыстық филиалының төрағасы Жандос Базартай филиалдың бастамасымен медициналық бағыттағы студенттер мен жас мамандарды тарту арқылы елімізде медициналық еріктілердің бірыңғай ұлттық желісін қалыптастыруды көздейтін AMANAT HEALTH жобасын іске асыру жоспарланып отырғанын жеткізді.
– Жобаның басты ерекшелігі – «Қос деңгейлі тәлімгерлік» моделінің енгізілуі. Бұл ретте партияның «Жастар рухы» жастар қанаты ұйымдастырушылық және инфрақұрылымдық қолдау көрсетсе, медициналық оқу орындары еріктілерді кәсіби даярлау мен әдістемелік сүйемелдеуді жүзеге асырады. Нәтижесінде біз еріктілер қатарын көбейтіп ғана қоймай, тәжірибелі, жауапкершілігі жоғары жас мамандардың жаңа буынын қалыптастыруға мүмкіндік аламыз. Конференция аясында партияның жастар қанаты мен Денсаулық сақтау министрлігі арасында екіжақты меморандумға қол қою жоспарланып отыр, – деді ол.
Салтанатты шара концерттік бағдарламаға, Қызылорда медициналық жоғары колледжі базасымен танысуға және «Сыр жұлдыздары» шығармашылық академиясындағы секциялық семинар-тренингке ұласты.
Семинар-тренингте студенттер «Көшбасшылық», «Еріктілер», «Болашақта сапалы медициналық көмектің негізі ретінде студенттік ғылым мен практикалық даярлық», «Қазақстанның цифрлық медицинасы»: Ақпараттық жүйелер мен АИ-шешімдердің интеграциясы» бағыты бойынша тәжірибе алмасты.
Айнұр БАТТАЛОВА,
«Сыр бойы»
