Алдағы екі күндікте кей өңірлерде ауа температурасы -18°С дейін төмендеуі мүмкін. Осындай болжам келтірген «Қазгидромет» РМК баспасөз қызметі 16-18 сәуір аралығында Қазақстан аумағындағы ауа райына екі барикалық түзілім әсер етеді: батыстан шығысқа қарай жылжитын циклон тұрақсыз ауа райын қалыптастырып, жауын-шашын (жаңбыр, қар), кей уақыттарда қатты жауын-шашын әкеледі деп отыр.
– Кезеңнің соңына қарай республиканың солтүстік, шығыс және орталық өңірлері солтүстік антициклонның ықпалына өтіп, соған байланысты ауа температурасының төмендеуі күтіледі. Қазақстан бойынша тұман түсіп, желдің күшеюі байқалады, ал солтүстік, шығыс және орталық аймақтарда көктайғақ болуы мүмкін, – дейді синоптиктер.
Кезеңнің басында солтүстікте түнгі ауа температурасы -1-ден -8°С дейін, (күндіз +8°С дейін) төмендейді. Кезеңнің соңында шығыста түнде -2-ден -18°С дейін (күндіз 0-ден +13°С) суытуы мүмкін.
Ал елдің қалған аумағында температуралық фон айтарлықтай өзгермейді.
«СБ» ақпарат
