Қазақ даласында дүниеге келген әлемнің екінші ұстазы Әбу Насыр әл Фарабидің балалық, жастық шағы туралы төл әдебиетіміздегі алғашқы пьеса көрермен назарына ұсынылды. Қызылорда жастар театры сахналаған, жазушы-драматург Жолтай Әлмашұлының «Отырардың жасыны» атты тарихи драмасының басты ерекшелігі осында.
Аты жер жүзіне таралып, ғылымның сан саласын, жетпіс тілді меңгерген ғұламаның отбасы, жастық шағы туралы деректер аз. Бұл қойылымда атақты қолбасшының ұлы жас Әбудің білім жолын таңдауы, ғылымға деген сол заман адамдарының көзқарасы бейнеленген.
А.Тоқмағанбетов атындағы қалалық мәдениет үйінде сахналанған драмаға зиялы қауым өкілдері, жастар қатысты.
– Спектакль өте сәтті шыққан деп ойлаймын. Жастар театрының шығармашылығы, кәсіби орындаушылығының арқасында диалог, оқиғалар желісімен айтылған философ, ғұлама ғалымның өмір тіршілігі өте сенімді суреттелді. Әл Фарабиге арналған сахналық қойылым – қоғамдық тарихи сананы сілкіндірген туынды. Сахнаның декорациясы, музыкасы ортақ ырғақпен ерекше үйлесім тапқан, – деді жырау Алмас Алматов.
Ал белгілі ғалым Қазыбай Құдайбергенов театр артистерінің әл Фарабиді бізге жақындатқанын айтып, жұмыстарына табыс тіледі.
Айта кету керек, спектакльдің қоюшы режиссері – театрдың көркемдік жетекшісі, ҚР Мәдениет қайраткері Оңталап Нұрмаханов. Бес жыл бұрын құрылған өнер ұжымы бүгінде өз көрерменін қалыптастырып келеді. Адамзат ақыл-ойының алыбы Абайдың 175 жылдығына орай, былтыр Қарағанды қаласында өткен «Театр. Талант шығармашылығы» атты халықаралық фестивальда Қызылордадағы жастар театрының артистері сахналаған трагифарс жанрындағы қойылым жоғары бағаға ие болды.
Айдана ЖҰМАДИНОВА,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
