Облыс әкімі Гүлшара Әбдіқалықова мемлекет және қоғам қайраткері Биғали Қаюповпен кездесіп, 70 жас мерейтойымен құттықтады. Аймақ басшысы мерейтой иесіне ізгі тілегін білдіріп, парасаттылығымен, қадір-қасиетімен, іскерлігімен, абыройлы қызметімен, жайсаң мінезімен елге танымал тұлғаға құрмет көрсетті.
– Сіздің еңбек жолыңыз, мол тәжірибеңіз, еңбекқорлығыңыз, ақыл-кеңесіңіз қазіргі жастар үшін аса қымбат. Сыр елінің қоғамдық-саяси, әлеуметтік-экономикалық дамуына қосқан ерекше үлесіңіз үшін облыстың Құрмет грамотасымен және Ауыл шаруашылығы министрлігінің «Ауыл шаруашылығы үздігі» төсбелгісімен марапатталасыз, – деді облыс әкімі.
Сондай-ақ, Б.Каюповқа Қазақстан Республикасы Парламенті Сенаты төрағасының құттықтауын табыстады. Мерейтой иесін ардагерлер кеңесінің төрағасы Серік Дүйсенбаев, бұрынғы Балық шаруашылығы министрі Құдайберген Саржанов және облыстық мәслихат депутаты Шәкизада Әбдікәрімов құттықтады.
Кездесу соңында Биғали Әбдікерұлы әріптестеріне ізгі тілек үшін ризашылығын білдіріп, елге қызмет етуді жалғастыра беретінін атап өтті. Елбасы қамқорлығындағы туған жері – Арал ауданының өркендеу жолына барын салатынын жеткізді.
Биғали Қаюпов 1951 жылы Арал қаласында дүниеге келген. Қоғам қайраткері, экономика ғылымдарының кандидаты. Қызылорда педагогика институтының (қазіргі Қорқыт ата атындағы Қызылорда университеті) филология факультетін, Алматы Халық шаруашылығы институтының жоспарлау-экономика факультетін, Мәскеу қоғамдық ғылымдар академиясын бітірген.
Еңбек жолын 1968-1969 жылдары ауыл мектебінде мұғалім болып бастаған. Облыстық, республикалық комсомол комитеттерінде бөлім меңгерушісі, хатшы, Қазақстан Компартиясында нұсқаушы, Қазақ КСР Жоғарғы Кеңесі Төралқасы төрағасының көмекшісі қызметтерін атқарды. Сырдария аудандық Кеңесі атқару комитетінің төрағасы, Арал аудандық партия комитетінің 1-хатшысы, аудандық Кеңестің төрағасы, Арал ауданының әкімі, ҚР Парламенті Сенатының депутаты, ҚР Президенті Әкімшілігінде мемлекеттік инспектор болды. Қармақшы және Жалағаш аудандарының әкімі болып қызмет атқарды. 2016 жылдан бері Арал ұн зауытының директоры қызметінде.
>>> Біздің Facebook, Instagram парақшаларымыз бен Telegram каналымызға жазылыңыз! <<<
