Алматының Әл-Фараби даңғылында көліктің есіктерін ашып, музыканы бар даусына қойған жүргізушінің әрекеті бейнекамераға түсіп қалды. Ол полиция назарына ілікті. Бұл туралы Stan.kz ақпарат агенттігі хабарлайды.
Әлеуметтік желіде тараған ақпаратқа сәйкес, жағдай таңғы сағат 04:00 шамасында болған. Жүргізуші көліктің алдыңғы екі есігін айқара ашып, музыканы қатты қойып, жүріп өткен.
Видеоны көрген желідегілер көліктегілердің жан-жағындағы адамдардың мазасын алып қана қоймай, жолдағы адамдардың өміріне қауіп төндіргенін жарыса жазды. Сондай-ақ тыныштық сақтап, басқаларды құрметтеуге шақырды.
Жол ережесін өрескел бұзғандардың видеосы полиция қызметкерлерінің де назарына ілікті.
“Аталған дерек бойынша Қоғамдық қауіпсіздік басқармасы тексеру жүргізіп жатыр. Жол қозғалысы ережелерін өрескел бұзғандар міндетті түрде анықталып, жауапкершілікке тартылады», – деп мәлімдеді ведомство.
