ҚР Президенті Телерадиокешенінің «Хроникадан болашаққа» кинолекторийі Сыр өңірінде жалғасын тапты. Кино апталығының бірінші күні көрермен назарына «Aral» деректі фильмі ұсынылды.
Ауқымды ағартушылық жоба Телерадиокешеннің 30 жылдығы аясында жүзеге асырылып отыр. Телерадиокешен 30 жылдан бері Қазақстанның шежіресін үзбей жазып келеді. Ел үшін маңызды оқиғалар, мемлекеттегі өзгерістер мен реформалар, халықаралық бастамалар, еңбек адамдары, түрлі тағдырлар, халықтың тұрмысы, қоғамның тынысы басты назарда.
– Қазақстанның 20 қаласын қамтитын «Хроникадан болашаққа» атты республикалық кинолекторий Астанадан басталды. Іс-шарамызды бұлай атауымыз тегін емес. Хроника – камераға түсіріліп, таспаға сақталатын оқиға. Деректі кино орталығы тәуелсіз Қазақстан жылнамасын жасауды жалғастыра береді. Әріптестерімізге, облыс әкімдіктері мен кинотеатрлардың басшылығына алғыс білдіреміз, – деді ҚР Президенті Телерадиокешені Деректі кино орталығының директоры Ақылбек Шалжанов.
«Арал» деректі фильмін ҚР Президенті Телерадиокешенінің жеке өндірістік базасы – Деректі кино орталығы түсірген. Сценарийін Нұрлан Қабдай жазған, режиссері – Зухраб Отаров, Дәулет Әуелбеков.
– Фильмді түсіруге бас-аяғы он күнге жуық уақыт кетті. Түсірілім жұмысының далалық жерде өтетініне дайын болдық. Кейіпкерді осыдан үш-төрт жыл бұрын сюжет түсірілімінде байқап қалып, көп ақпарат жинап, әбден зерттедік. Атамыз арқылы адам мен табиғаттың үйлесімін, барлығын шынайы көрсетуге тырыстық, – деді ҚР Президенті Телерадиокешенінің режиссері Дәулет Әуелбеков.
Деректі туындыда жарты ғасырдан астам ғұмырын балық аулаумен өткізген Күнтуған Тұрғанбаевтың портреті арқылы теңіздің бүгіні мен болашағы көрініс тапқан. Көрсетілімге орталық мамандары мен фильмнің бас кейіпкері арнайы қатысты.
– Балық шаруашылығы саласында жұмыс істедім. Деректі фильм түсіруге қарт балықшы керек болғандықтан өзім тұратын Арал ауданы Қаратерең ауылының әкімі үлкен теңізді көрген байырғы жергілікті тұрғын әрі қарт балықшы ретінде мені ұсынған екен. Кәсіби шеберлігім болмаса да ұсынысты қабыл алдым. Бір аптадай түсірілім құрамының қарамағында болдым. Өзім балық аулаған орынды көрдім. Теңіз өткен ғасырдың алпысыншы жылдарында қайта бастады. Бас-аяғы жиырма жылдың ішінде шаңы көтеріліп, тақырға айналды. Түсірілім барысы өзіме ұнады. Бәрі өз ісінің шеберлері болғасын ешқандай қиындық туған жоқ, – деді Күнтуған Тұрғанбаев.
Көрсетілімнен кейін облыс әкімінің орынбасары Мейрамбек Шермағанбет ҚР Президенті Телерадиокешенінің ұжымын 30 жылдық мерейтоймен құттықтап, теңіз мәселесін дөп басқан әсерлі туынды үшін Сыр жұртшылығы атынан алғыс айтты.
– Бүгін өзіміз де Кіші Аралға барып қайтқандай әсерге бөлендік. Сәтті түсірілген. Кәсіби актер болмаса да Күнтуған атамыз Аралдың тағдырын жақсы баяндап берді. Бұл – бір ғана адамның емес, Аралдың тағдыры. Жарты сағатқа Аралдың өткені мен бүгінін сыйдырғаны көңілге жылылық ұялатты. Ұлттық құрылтайдың V отырысында Мемлекет басшысы Арал теңізі мәселесіне тоқталып, оның жаһандық маңызын атап өтті. Аралдың өз тарихында бірнеше рет тартылып, қайтадан толғаны туралы айтылып жүр. Президент бастамасымен атқарылып жатқан ауқымды жұмыс нәтижесінде ұлы теңіздің әлі де оралатынынан үміттіміз, – деді Мейрамбек Шермағанбет.
Деректі фильмнің мақсаты ақпаратты аудиторияға жеткізу ғана емес, сондай-ақ көрермен эмоциясына белгілі бір әсер қалдыруы маңызды. Көрсетілімнен соң біз көрермен пікірін білдік.
– Түсірілім деңгейі өте жоғары, тақырып та жақсы ашылған. Балық аулау кәсібінің ерекшеліктері, теңіздің бұрынғы орны, кейбір дүниелердің жергілікті тілде аталуы фильмнің маңызын байыта түскен. Аралға табаны тимеген әрбір адамда «теңізді бір көрсем» деген арманды оятқандай, – деді қала тұрғыны Нұрлан Көбегенұлы.
Кинолекторийдің екінші күні көрермен үздік авторлық деректі фильмдердің қатарындағы «Серт» және «Travel Kazakhstan» туындыларын тамашалады.
«Серт» фильмі кейіпкерлер оқиғасы арқылы 2024 жылдың көктемінде Атырау, Ақтөбе, Ақмола, Қостанай, Солтүстік Қазақстан және Батыс Қазақстан облыстарында болған алапат су тасқынын бүкіл ел болып қалай еңсергенін баяндайды. Сондай-ақ апаттан кейінгі бес ай ішінде Мемлекет басшысының тапсырмасы қалай орындалғанын көрсетеді.
Ал екінші туынды – еліміздің туристік әлеуеті мен мүмкіндіктеріне арналған фильм. Ол «Қазақстан әлемдік туризм картасында елеулі аймақ болуға дайын ба?» деген сұраққа жауап береді.
ҚР Президенті Телерадиокешенінің «Хроникадан болашаққа» республикалық кинолекторийі 21 мамыр күні Астана қаласында ресми түрде ашылды. Сыр өңірінен кейін Түркістан, Шымкент, Тараз, Ақтау, Атырау, Орал, Ақтөбе, Өскемен, Семей, Павлодар, Петропавл, Қостанай, Жезқазған, Қарағанды, Көкшетау, Талдықорған және Қонаев қалаларында жалғасады. Қорытынды көрсетілім 25 қыркүйекте Алматы қаласында өтеді.
Кинолекторий көрерменді ҚР Президенті Телерадиокешенінің ең үздік авторлық деректі фильмдерімен таныстырады. Көрсетілімдер облыс әкімдіктерінің қолдауымен өңірдегі кинотеатрларда өтеді. Кіру тегін.
Назерке САНИЯЗОВА,
«Сыр бойы»
