Халқымызда «Еңбек еткеннің еңсесі биік» деген тәмсіл бар. Өмір өрімінде өзінің маңдай терімен абырой биігіне көтерілген азаматтарды көргенде осы лебіз ойыңа оралады. Еңселі еліміздің уығын тіктеп, келешекке қарышты қадам жасауына осындай еңбекқор жандардың тигізген пайдасы ұшан-теңіз. Елімізде қарапайым еңбек адамдарын дәріптеу мақсатында қолға алған игі істердің бірі – «Еңбек жолы» конкурсы.
Соңғы жылдары аталған конкурс тұрақты түрде өткізіліп келеді. Биыл да сол жарасымды үрдіс жалғасын тапты. Жақында республикалық деңгейде өтетін маңызды шараның облыстық кезеңінде еселі еңбек арқылы абыройға бөленген ардақты азаматтар үш номинация бойынша марапатқа лайық деп танылды.
– Конкурс өңірдегі үздік еңбек әулеттері мен өндіріс жұмыскерлерін айқындауға мүмкіндік береді. Конкурс «Жалпыға ортақ Еңбек қоғамы» ұраны бойынша өткізіліп келеді. Ол еңбек адамының қоғамдағы беделін арттыруға және өнімді еңбекті ынталандыруға ықпал етеді деген ойдамыз. Конкурс 3 номинациядан тұрады. Сол арқылы үздік еңбек әулеті, өндірістің үздік жас маманы және жұмыс істейтін жастардың үздік тәлімгері анықталды. Бұл азаматтар республикалық кезеңге жолдама алды, – деді облыстық жұмыспен қамтуды үйлестіру және әлеуметтік бағдарламалар басқармасының бөлім басшысы Нұржан Өмірзақов.
Биыл «Үздік еңбек әулеті» номинациясы бойынша қармақшылық Балшыновтар әулеті құрмет төрінен көрінді. Ел ішінде зор қошеметке бөленген Құдайберген Балшынов ұзақ жылдан бері өңірдің мәдениет саласының дамуына сүбелі үлес қосып келеді. Аудандағы Т.Көмекбаев ауылдық клубын басқаратын ол – аймақтың руханият әлеміне өз қолтаңбасын қалдырған азамат. Бүгінде 54 жасқа толған ел ағасы Қорқыт ата атындағы Қызылорда педагогикалық институтының әуез және мәдени ағарту саласы бойынша тәмамдаған. 1994 жылдан бастап ауылдық әуез мектебінде алдымен баянист, одан кейін директор қызметін атқарды. Ал 1997 жылы ауылдық клубқа қызмет ауыстырған ол 2014 жылдан бері аталған мекемеге жетекшілік жасап келеді. Өзінің еңбек жолында көптеген марапатқа ие болды.
Өрелі өнер иесі бала жасынан ұлттық құндылықпен сусындап өсті. Әкесі – Жылқыбай ел арасында түрлі дастандар мен жыр-термелерді нақышына келтіре орындайтын ерекше қасиетімен жақсы танымал. Оған қоса ағаштан түрлі бұйымдарды жасайтын ұсталығы бар. Анасы – Қанымкүл он саусағынан өнер тамған қолөнер шебері, алаша, түскиіз, кілем, киіз, тоқыма бұйымдары халық арасында зор сұранысқа ие. Құдай қосқан қосағы – Нұржамал Байжанова да ауылдық клубта ұзақ жылдан бері түрлі қызметтерді атқарып келеді.
Қазалы теміржол ауруханасының хирург-дәрігері Сәдуақас Ахмет конкурстың облыстық кезеңінде «Жұмыс істейтін жастардың үздік тәлімгері» номинациясына лайық деп танылды. Ақ халатты абзал жан медицина саласында 1993 жылдан бері жемісті еңбек етіп жүр. Бүгінгі күнге дейін 5 мыңнан астам хирургиялық ота жасап, қаншама адамның өміріне араша түсті. Денсаулық сақтау министрлігінің бірыңғай ұлттық жүйені енгізу бағдарламасымен жұмыс жасауға көңіл бөліп, бұл бағытта мол тәжірибе жинақтады. 2010 жылдан бері аталған ауруханада бөлімше меңгерушісі қызметін атқарып келеді.
Білікті дәрігер халықаралық хирургиялық конференцияларға тұрақты түрде қатысады. Үнемі білімін жетілдіріп отырады. Қазірге дейін жасаған хирургиялық отасының барлығында ешқандай асқыну жағдайы тіркелген жоқ. Өзінің білімі мен біліктілігінің арқасында жұмыс істейтін жастардың үздік тәлімгеріне айналды.
Сырдария ауданында ұстаздық қызмет атқарып жүрген Жансая Залова облыстық кезеңде «Өндірістің үздік жас маманы» болды. Ол қазір аудан орталығындағы №210 О.Әбілпаттаев атындағы орта мектебінде информатика пәнінен тәлім береді. Жас та болса өзінің еңбекқорлық қасиетінің арқасында көптеген марапатқа ие болды. Еңбек қашанда бақытқа жеткізеді. Ел тәуелсіздігінің тұғырлы болуы ұрпақтың жігерлі жұмыс жасап, Отанды шексіз сүйе білуіне тікелей байланысты. Шын жүрегімен, жан-тәнімен беріле жұмыс істеген адам туған жердің түлеуіне зор үлесін қосады.
>>> Біздің Facebook, Instagram парақшаларымыз бен Telegram каналымызға жазылыңыз! <<<
