Облыста белсенді қызмет ететін үкіметтік емес ұйымдар саны артқан. Олар қоғамдық жұмыстарға қатысып, түрлі әлеуметтік жобаларды жүзеге асыруда. Осындай белсенді ұйымдардың бірі – Жалағаш ауданындағы «Темірқазық» қоғамдық бірлестігі. 2005 жылы құрылған ұйым ерікті жастардың басын қосып, тың бастамаларға мұрындық болуда.
Қоғамдық бірлестік төрағасы, «Қызылорда облысының үкіметтік емес ұйымдарының альянсы ассоциациясы» ЗТБ-ның аудан бойынша өкілі Нұржан Амандық бірлестіктің атқарып жатқан жұмысы жайында кеңінен әңгімелеп берді. Ұйым жастардың шығармашылығын дамыту мақсатында ресрустық орталықпен бірлесіп, байқау, аудан әкімінің жастар сыйлығын, жастар лагерін, «Жайдарман» лигасын және еріктілер мектебі жобаларын дәстүрлі түрде ұйымдастырады.
– Өткен жылы тұңғыш рет еңбек лагері ашылып, оған 25 ерікті таңдап алынды. Олар тұрмысы төмен, жалғызбасты қарттар мен аналарға қолғабыс етіп, үй шаруасына көмектеседі. Сонымен қатар бірлестік биыл аудандық ішкі саясат бөлімінің аудандағы жұмыссыз, NEET санатындағы жастарға бағытталған шараларды ұйымдастырды. Шығармашылықты, еріктілер корпусын дамыту бойынша іс-шаралар өткізу және патриоттық тәрбие беру, азаматтық белсенділігін арттыруға бағытталған жұмыстарды жүйелі атқарып келеді, – деді Нұржан Амандық.
Биыл ұйымның әлеуметтік жобалар аясында өткізген шараларына 1200-ден астам жас қатысқан. Пандемияға байланысты жиындар онлайн форматта жалғасып жатыр. Еріктілер тұрғындарға үнқағаздар мен медициналық бетперделер таратып, акция өткізіп, азаматтарға қолдау көрсетуде. Сонымен бірге қоғамдық бірлестік белсенділері мен ерікті жастар Дәуімбай елді мекені тұрғыны, жалғызбасты ананың үйін күрделі жөндеуден өткізді. Әлеуметтік аз қамтылған, көпбалалы, жалғызілікті қариялар мен жағдайы төмен отбасыларына «Біз біргеміз» ұранымен азық-түлік таратып, олармен тығыз байланыс орнатты. Сондай-ақ, «ДорСтрой», «Абай-Дәулет» ЖШС аудан халқына демеушілік жасап, тұрмысы төмен отбасыларына көмек берді. Елмен етене жүріп, мұқтаж жандарға көмек қолын созған жомарт жандар еріктілермен бірігіп, қайырымды істердің қасынан табылып жүр. Жас еріктілердің бастамасы мен жобалары үнемі қолдау тауып, әлеуметтік мәселелердің шешілуіне ықпал етуде.
Ерікті жастар 200 отбасына азық-түлік себетін үлестіріп, індет өршіген тұста қарттардың үйіне дәрі-дәрмек, азық-түлік өнімдерін жеткізіп отырды. Мәселен, Жалағаш кенті тұрғыны, жалғызбасты ана Е. Буланованың үйіне жөндеу жұмыстарын жүргізіп, шатыр, есігі мен терезесін жаңалады. Қайырымды істің қасынан табылған жанашыр жастар ел алғысына бөленіп келеді. Ізгі мақсаттың бастауында жүрген бірлестік жастарының жақсылыққа деген талпынысы жемісін беріп келеді.
Жалпы, үкіметтік емес ұйымдардың Президент Жолдауынан туындайтын міндеттерді жүзеге асыру бойынша атқарып жатқан жұмыстарына оң баға беруге болады. Мемлекет тарапынан оларға соңғы жылдары зор көңіл бөлінуде. Белсенді азаматтық қоғам құру үшін үкіметтік емес ұйымдардың беделін арттыру қажеттілігі де назарда.
Бүгінде Жалағаш ауданы бойынша 25 үкіметтік емес ұйым бар. Оның ішінде қоғамдық қор саны – 12, бірлестік –13.
>>> Біздің Facebook, Instagram парақшаларымыз бен Telegram каналымызға жазылыңыз! <<<