Тәуелсіздіктің 30 жылдығына орай Нұр-Сұлтан қаласында даңқты қолбасшы Жалаңтөс баһадүрге ескерткіш орнатылады. Бұл туралы өңірлік коммуникациялар қызметінде өткен брифингте облыстық мәдениет, архивтер және құжаттама басқармасы басшысының орынбасары Ержан Жеткерұлы айтты.
Басқарма басшысының орынбасары мәдени мұраларды сақтау мен қорғау мәселелеріне жалпы жұртшылықтың назарын аудару мақсатында жасалып жатқан жұмыстарға тоқталды. Бүгінде облыста 545 ескерткіш мемлекеттік тізімге алынған. Оның ішінде 30 республикалық, 257 жергілікті маңызы бар тарих және мәдениет ескерткіші бар. Сондай-ақ, 258 нысан тарихи-мәдени мұра объектілерінің алдын ала тізімінде.
– Биыл «Рухани жаңғыру» бағдарламасының «Қазақстанның киелі жерлерінің географиясы» жобасы аясында 3 археологиялық ескерткішке – ежелгі Бәбіш мола және ортағасырлық Жанкент, Сығанақ қалашықтарына археологиялық қазба жүргізу жоспарлануда, – деді Ержан Жеткерұлы.
Сонымен қатар, қазіргі уақытта «Цифрлық Қазақстан» бағдарламасы аясында облыс көлемінде 150 ескерткіштің 3D форматтағы интерактивті картасы әзірленіп, 150 ескерткішке QR-код тақтайшалары орнатылды. Бұл жұмыстар биыл да жалғасады.
Айта кетелік, 18 сәуір – Халықаралық ескерткіштер мен тарихи орындар күні. Оны 1983 жылы ЮНЕСКО жанындағы ескерткіштер мен көрікті орындар мәселелері бойынша халықаралық кеңес ассамблеясы (ИКОМОС) бекіткен. Атаулы күн қарсаңында өңірдегі мәдениет мекемелерінде онлайн форматта түрлі бағыттағы шаралар және ескерткіштер аумағында сенбіліктер ұйымдастырылады.
>>> Біздің Facebook, Instagram парақшаларымыз бен Telegram каналымызға жазылыңыз! <<<
