Қазақстан Халық партиясының Қызылорда облыстық филиалы өңірдегі жол қозғалысы қауіпсіздігін арттыру мәселелеріне арналған «Қауіпсіз жол – қауіпсіз ел» атты дөңгелек үстел ұйымдастырды. Іс-шараға облыстық әкімдік өкілдері, полиция департаментінің мамандары, қоғамдық ұйымдар мен сарапшылар, сондай-ақ жергілікті бұқаралық ақпарат құралдарының өкілдері қатысты.
Шараның мақсаты – партия жүзеге асырған жоба нәтижелерін талқылау, жол-көлік оқиғалары жиі тіркелетін қауіпті учаскелерді таныстыру, оларды жоюға бағытталған ұсыныстарды қарастыру және инфрақұрылымды жетілдіру жөнінде әкімдік пен полиция тарапынан нақты міндеттемелер алу болды. Сонымен қатар іс-шара қоғам мен БАҚ назарын жол қауіпсіздігіне аударуға және әлеуметтік маңызы бар бастамаларды қолдайтын саяси ұйым ретінде Қазақстан Халық партиясының рөлін күшейтуге бағытталды.
Шараға қатысушылар қатарында облыстық ТКШ, көлік және қала құрылысы бөлімдерінің мамандары, полиция департаментінің басшылығы, білім саласының өкілдері, жол қауіпсіздігі бағытындағы сарапшылар мен қоғамдық белсенділер, сондай-ақ ҚХП өңірлік филиалының мүшелері болды.
Кездесу барысында қауіпті учаскелер бойынша нақты ақпарат ұсынылып, оларды реттеу және алдын алу шаралары қарастырылды. Сарапшылар жол инфрақұрылымын жаңғырту, жарықтандыруды жақсарту, жаяу жүргіншілер өткелдерінің қауіпсіздігін арттыру және жылдамдықты бақылау жүйелерін жетілдіру бойынша бірқатар ұсыныстар білдірді.
Дөңгелек үстел қорытындысында жол-көлік оқиғаларының санын азайтуға, өңірде қауіпсіз жол қозғалысы мәдениетін қалыптастыруға және барлық жол қозғалысына қатысушылар үшін қолайлы жағдай жасауға бағытталған ортақ іс-қимылдар айқындалды.
Қауіпсіз жолды қамтамасыз ету – қоғам, мемлекеттік органдар және азаматтық сектор үшін ортақ міндет болып табылады.
