Облыс әкімі Гүлшара Әбдіқалықованың төрағалығымен сыбайлас жемқорлыққа қарсы іс-қимыл мәселелері жөніндегі кезекті комиссия отырысы өткізілді.
Онда облыс бойынша экология департаментінің басшысы Марат Құрманбаев пен Қызылорда облысының төтенше жағдайлар департаментінің басшысы Бағдат Данилов сыбайлас жемқорлыққа қарсы іс-қимыл бағытында биылғы жылдың 7 ай қорытындысын баяндады.
Отырыста сыбайлас жемқорлық тәуекелдерін азайту, лауазымды қызметкерлердің қызметтiк өкiлеттiктерiн асыра пайдалану, кәсіпкерлік субъектілерге артықшылықтар көрсетуге жол бермеу қажеттілігі айтылды.
– Мемлекет басшысының төрағалығымен сыбайлас жемқорлыққа қарсы іс-қимыл мәселелері бойынша арнайы кеңес өткізілді. Президент жемқорлықты жою бойынша нақты міндеттерді белгіледі. Осыған сәйкес барлық мемлекеттік орган басшылары бұл бағыттағы жұмыстарды жандандырып, белсенділік танытуы қажет. Қызметімізде, қоғамда жемқорлыққа мүлдем төзбеушілік қағидатын қалыптастыруымыз қажет, – деді аймақ басшысы.
Облыс әкімі сала басшыларының баяндамларынан кейін сыбайлас жемқорлық сипатындағы теріс іс-әрекеттердің алдын алу мақсатында қызметкерлермен жекелеген профилактикалық жұмыстар жүргізуді, жемқорлық тәуекелдеріне ішкі талдау жасауды басым бағыттарды айқындауды тапсырды. Сондай-ақ, жаңадан тағайындалған, тәжірибесі жеткіліксіз қызметшілердің біліктілік деңгейлерін арттыру шараларын қабылдау қызметтен тыс жеке тұлғалармен, кәсіпкерлік субъектілерімен ретсіз қарым-қатынастарын болдырмауға бағытталған қосымша шаралар ұйымдастыруды қаперге салды.
Отырыста сыбайлас жемқорлықтың алдын алу бағытында арнайы мониторингтік топтың 7 ай нәтижесіндегі қорытындысы тыңдалып, аталған топ төрайымы Ляззат Бақтыбаева баяндама жасады.
Сыбайлас жемқорлық тәуекелдерін төмендету бағытында мониторингтік топ өкілдері 14 ұсыным енгізген. Оның қазір 7-і орындалып, қалғаны орындалу үстінде. Сонымен бірге мониторингтік топ бірқатар бағыттарға жұмысшы топтармен бірге зерделенген жұмыстарды таразылап, ұсыныстарды ортаға салды.
Облыс әкімі көзделген мәселелерді тыңдай келе Қызылорда қаласы мен аудан әкімдеріне қалалық және аудандық әкімдік жанындағы арнайы мониторингтік топтардың жұмысын үйлестіріп, сыбайлас жемқорлыққа қарсы бағыттағы шараларды күшейтуді тапсырды. Сонымен бірге арнайы мониторингтік топпен атқарылған жұмыстар департаменттің ресми интернет-ресурсында, әлеуметтік желіде кеңінен ақпараттандыруды және сыбайлас жемқорлыққа қарсы жүргізілетін сыртқы талдау нәтижесінде көзделген ұсыныстар мемлекеттік органдармен орындалып, арнайы мониторингтік топқа жолдануын бақылауды міндеттеді.
>>> Біздің Facebook, Instagram парақшаларымыз бен Telegram каналымызға жазылыңыз! <<<
