Соғыста қаза тапқан аралдық жауынгердің сүйегі туған жеріне оралды. Арнайы борт арқылы Ресейден Қазақстанға, одан облыс орталығына жеткізілді. Сыр бойынан шыққан азаматтың сүйегі осылайша 78 жылдан соң туған өлкесі Аралдың Бекбауыл ауылына жақын «Нұрша» қорымына қойылды.
Осы хабар әлеуметтік желіден бөлек, елдің бас басылымы – «Egemen Qazaqstanda» жазылған еді. Ресейлік «Витязь» іздеушілер тобының командирі Дмитрий Федосовтың бастауымен Тверь облысының Зубцов ауданындағы қазу жұмыстары кезінде Отан соғысында оққа ұшқан сарбаздың сүйегі табылған. Жауынгермен бірге жерленген кішкентай құтының ішінен шыққан құжаттарды зерттеген Мәскеудегі «Солдатский медальон» атты іздеушілер орталығы мамандары мәңгілік мекенін Тверьден тапқан сарбаздың майданға Сыр бойынан шақырылған Келіс Жиенбаев екендігін анықтапты. Іздеушілер мәліметінше капитан Жиенбаев 1942 жылдың тамызында көз жұмған.
– Капсула өте жақсы сақталған. Мәтін қарындашпен салынған, сондықтан біз арнайы техниканың көмегінсіз жазбаларды оқыдық, – дейді зертхана сарапшысы Олег Гусев. Іздеушілердің айтуынша, қазақ жауынгерінің туыстарын табу үшін қолдан келгеннің бәрін жасаған.
Мәліметке сүйенсек, капитан Жиенбаев 180-ші атқыштар дивизиясы 31-ші Батыс майданы әскерлері құрамында болып, Тверь облысы Зубцов ауданындағы кезекті шайқастардың бірінде 1942 жылдың тамыз айында ұрыс кезінде қаза тапқан.
Облыс әкімінің орынбасары Н.Байқадамов, әскери қызметкерлер жауынгердің сүйегін «Қорқыт ата» әуежайынан күтіп алды. Ал жерлеу рәсімі туған жерінде өтті. Шараға Қызылорда гарнизоны басшылығы, қалалық әкімдік пен қалалық соғыс және еңбек ардагерлері кеңесінің өкілдері және жауынгердің туыстары қатысты. Осынша жылдан кейін табылған соғыс солдатын туған топырағымен қауыштыруға себепші болған ұйымдастырушыларға Келіс Жиенбаевтың туыстары алғыс білдірді.
Ержан ҚОЖАСОВ,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
