Мәдениет және өнер қызметкерлері күніне орай «Өнер орталығында» салтанатты шара өтті. Бұл – ұлт руханиятын дамыту жолында еңбек етіп жүрген мамандарға көрсетілген құрметтің белгісі. Шараға сала ардагерлері, өнер майталмандары және зиялы қауым өкілдері қатысты.
Облыс әкімі Мұрат Ергешбаев мәдениет пен руханияттың қоғам өміріндегі айрықша маңызын атап өтіп, сала қызметкерлерін кәсіби мерекемен құттықтады.
– Аймақта мәдениет саласын дамыту бағытында жүйелі жұмыстар атқарылуда. Кейінгі төрт жылда салаға 55 млрд теңгеге жуық қаржы бағытталса, биыл 6 млрд теңгеден астам қаржы бөлінді. Облыста Мемлекет басшысының, Үкіметтің қолдауымен 200-ден астам әлеуметтік нысан бой көтерді. Оның ішінде 22 мәдениет нысаны салынып, ел игілігіне берілсе, 7 ауданда «Руханият орталықтары» ашылды. Қалада «Өнер орталығы», «Анаға тағзым», «Отбасы орталығы» салынып, халыққа қызмет етуде. Тарихи-өлкетану музейінің, «Достық үйінің» жаңа ғимараты пайдалануға берілді. Балалардың шығармашылық, зияткерлік әлеуетін арттыру мақсатында «Оқушылар сарайы», «Сыр жұлдыздары» академиясы ашылды. Мемлекет басшысының Ұлттық құрылтайда берген тапсырмасына сәйкес жаңа драма театр мен Президенттік кітапхананың құрылысы бастау алды.
Мемлекет басшысы Қасым-Жомарт Кемелұлы: «Мәдениет – ұлттың төлқұжаты. Жаһан жұрты елімізді, ең алдымен, өнеріміз арқылы танып біледі» деген болатын. Мәдениет – елдің рухани тірегі, ұлттың ұлы мұрасы. Осы жолда аянбай еңбек етіп жүрген мәдениет қызметкерлеріне Сыр жұртшылығы атынан шынайы ризашылығымды білдіремін.
Өнер мен руханияттың өрісі кеңейіп, мәдениетіміздің мәртебесі әрдайым биік болсын! Еліміздің рухани дамуына қосып жүрген еңбектеріңіз жемісті болып, шығармашылық табыстарыңыз арта берсін, – деді аймақ басшысы.
Шара театр әртістерінің қойылымымен басталды. Мәдениет және өнер қызметкерлері өздерінің кәсіби мерекелерінде де жұмыста, яғни сахнада. Тұрмағанбет атындағы халық аспаптар оркестрінің сүйемелдеуімен «Томирис» би ансамблі «Шаңырақ шаттығы» биін орындады. Ал Ақсұңқар Бүркітбай, Нұртілек Ақтаев, Бексұлтан Орынбасаров орындаған «Сыр елі», «Нартайдың жыр бастауы» және «Мерекелік арнау», жас күйшілердің «Балбырауын», «Сарыарқа», «Көрұғлы» күйлері көпшіліктің ыстық ықыласына бөленді. Қорқыт ата атындағы Қызылорда университетінің қыздар вокалды ансамблі «Сырдың қараторғайын» нақышына келтіре шырқады. Ал «Сыр сандуғаштары» тобы мен Қ.Ақдәулетова атындағы студия балалары К.Әзірбаевтың «Көкшолақ» әнін орындады. Одан әрі қобызшылар, үрмелі аспаптар ансамблі де өз өнерлерін ортаға салды. Әншілер тобының классикалық әндер шеруі көпшіліктің қошеметіне ие болды.
Мерекелік шара аясында мәдениет саласындағы үздік жетістіктері және салаға сіңірген айрықша еңбегі үшін бірқатар азамат «Құрмет» орденімен, Мәдениет және ақпарат министрлігінің «Еңбек ардагері», «Мәдениет саласының үздігі» төсбелгісімен, Құрмет грамотасымен және Алғыс хатпен марапатталды.
Мереке иелеріне ҚР Премьер-министрінің бірінші орынбасары Нұрлыбек Нәлібаевтың Алғыс хаты табыс етілді.
Сыр елінің рухани-мәдени дамуына қосқан үлесі үшін бірқатар азаматқа облыстың Құрмет грамотасы және облыс әкімінің Алғыс хаты табысталды. Сондай-ақ бірқатар әдебиет пен өнер өкілдеріне дәстүрлі түрде жыл сайын табысталатын облыс әкімінің «Тұран» сыйлығы берілді.
Мәдениетке аса мән берудің нәтижесінде қазақ өнері әлемді шарлап, төл туындыларымыздың ғажайып болмысын паш етіп келеді. Бұған дейін Сыр өнерпаздары Финляндия, Эстония, Испания, Швейцария елдерінде мәдени шаралар ұйымдастырды.
Бүгінде Еуропаның Париж және Люксембург қалаларында Сыр таланттары өнер көрсетуде.
Сондай-ақ биыл композитор Кеңес Дүйсекеевтің, ақын Шөмішбай Сариевтің 80 жылдығына, Қазақстанның еңбек сіңірген әртісі Қаракөз Ақдәулетованың 70 жылдығына арналған еске алу шаралары өткізілді.
Әйгілі жырау, ұстаз-ғалым Алмас Алматовтың 70 жас мерейтойына арналған «Жыр керуен» шығармашылық кеші ұйымдастырылды. Даңқты қолбасшы Жалаңтөс баһадүрдің 450 жылдығына арналған республикалық ақындар айтысы жоғары деңгейде өтті.
Оған қоса жақында Ыстамбұл қаласында ТҮРКСОЙ ұйымының қолдауымен «Оғыз феномені: Ұлы даладан Анадолыға дейін» халықаралық конференциясы мен көрме ұйымдастырылған болатын.
Сара АДАЙБАЕВА,
«Сыр бойы»
