«Жерде бір бала қуанса, көкте мың періште шаттанады» дейді қазақ халқы. Бар жақсыны балаға арнаған, бар тәттіні баланың аузына тосқан елміз.
Шиелі ауданында ерекше қажеттілігі бар балаларға қызмет көрсетіп отырған №3 облыстық балалар оңалту орталығы бар. Облыстық білім басқармасына қарасты орталыққа биыл 10 жыл уақыт болыпты. Мекеме директоры Г.Бердиеваның іскерлігінің арқасында көптеген түйінді мәселелер шешімін тауып, орталық жұмысы жақсы жолға қойылған. Осы уақыт ішінде қаншама ата-ананың көңіліне қуаныш пен үміт сыйлап, қаншама ерекше баланың өмірінің өзгеруіне себепші болдық.
Біздегі педагогикалық ұжым жұмысының негізгі бағыты – баланың өзін-өзі жүзеге асыруына, оның белсенді азаматтық ұстанымының қалыптасуына ықпал ететін жеке қасиеттерінің дамуына көмектесу. Орталық бала туғаннан бастап жеті жас аралығындағы мектеп жасына дейінгі мүмкіндігі шектеулі балаларға әлеуметтік, психологиялық-педагогикалық, медициналық оңалту қызметін көрсетеді.
Ашылған күннен бүгінгі күнге дейін орталық облыс бойынша 1056 балаға көмек көрсетті. Оның ішінде Шиеліден 929, Жаңақорғаннан 121, Қызылорда қаласынан 2, Жалағаш ауданынан 1 және Алматы облысынан 3 балаға (жергілікті жерге тіркеуге тұрып) оңалту қызметін ұсыныпты.
Орталықта 57 қызметкер болса, оның ішінде 10 тәрбиеші, 6 арнаулы педагог маман бар. Төрт медбике және бала дәрігері, реабилитолог дәрігер, емдік уқалау маманы, емдік дене шынықтыру нұсқаушысы, әлеуметтік педагог, педагог-психолог жұмыс істейді.
Біздің ұжым он жыл тәулік бойы үздіксіз жұмыс жүргізді деп айтсақ, қателеспейміз. Себебі, бұл жерде дәрігерлік-педагогикалық оңалтуға зәру бүлдіршіндер тәрбиеленуде. Оларға барлық жағдай жасалған. Соның нәтижесінде 10 жыл ішінде 86 бала мектепке жалпы білім алуға жіберілді. Ал мектепке дейінгі білім ұйымдары, соның ішінде балабақшаға түзету жұмыстарының оң нәтиже көрсетуіне байланысты 171 бала қосылды.
Медициналық емдік, оңалту шаралары нәтижесінде балалардың церебральды салдануы, коксартроз, жамбас ұршық буынында өзгерісі бар диагнозымен келген балалар өздігінен жүріп-тұруға үйреніп жатыр. Психологиялық-педагогикалық көмек көрсету барысында психологтың әр баланың жас ерекшелігі мен даму деңгейіне орай жүргізген түрлі ойын, ертегі, музыка, құм, арт терапиялары арқылы балалардың эмоционалды ерік сферасы, танымдық қабілеттері; ойлау, есте сақтау, қиялдау, зейін тұрақтылықтары қалыптасты. Ал әлеуметтік-тұрмыстық бағдарлау бағытында жүргізілген жұмыс нәтижесінде балалардың қоршаған ортаға бейімделуі, өз-өзіне қызмет етуі, қарым-қатынас дағдыларын меңгеруі, әлеуметтік-эмоционалдық дамуы жүзеге асырылды.
Әрине, бұл атқарылған жұмыстардың бәрі мекемедегі әрбір қызметкерден үлкен төзімділікті, қажыр-қайрат, шыдамдылықты талап етеді. Ең бастысы, балаларымыздың бақытты күлкісі бізді жігерлендіре береді.
Нұржамал ЕСПАНОВА,
№3 облыстық балалар оңалту орталығы директорының орынбасары
>>> Біздің Facebook, Instagram парақшаларымыз бен Telegram каналымызға жазылыңыз! <<<