«Оқуымды бітіріп алғанмын, диплом қалтада» деп шырт түкіріп жүрудің заманы өткен. Қазір қай саланың маманы болмасын білімі мен біліктілігін жетілдіріп отырмаса, заман көшінен кейін қалып қояды. «Түстік өмірің болса, кештік білім ал» деген нақыл сөзді қаперге алатын кезең айқын сезіліп тұр.
Мамыр айының басында «ҚЭТТК» АҚ-да РФ Президенті жанындағы Ресей халық шаруашылығы және Мемлекеттік қызмет академиясының корпоративтік басқарудың жоғары мектебін (ВШКУ РАНХиГС) МВА бағдарламасы бойынша тыңдаушыларына диплом беру салтанаты болды. Қызылорда қаласында аталған оқу орнының Іскерлік әкімшілік басқару шебері (МВА) бағдарламасы бойынша оқу курсы 2018 жылы басталды.
Жалпы корпоративтік басқарудың жоғары мектебі бизнес құрылымдары мен ұлттық компаниялардың басқару командасы мүшелері мен орта буын мамандарын қазіргі заманда табысты бизнес жүргізу әдістерін үйрететін, осы бағытта білім беретін білім ордасы саналады. Ал MBA – бизнесте, мемлекеттік қызметте және муниципалдық басқаруда тиімді жұмыс жүргізуге машықтандыратын бірден-бір бағдарлама. Әзірге бизнестану саласында одан артық бағдарлама ойлап тапқан жоқ. Сондықтан да оған сұраныс жоғары.
Бағдарлама бойынша білім алған мамандар бизнестің тұрақты даму стратегиясын анықтап, компаниясының негізгі құндылықтарын көре біледі және оны дамытуға шешім қабылдайды. Конструктивті жаңа идеяларды түрлендіріп, оларды жүзеге асыруға қабілеті артады. Ұжымның және оның әрбір мүшесінің шығармашылық қуаты мен іскерлік қабілетін байқай біліп, оны қажетті бағытқа жұмылдыруға жұмыс жүргізе алады. Бизнестің әлеуметтік жауапкершілігі мен бизнесті жүргізу этикасы қағидасын жете түсінеді. Отандық және халықаралық рынокта табысты жұмыс жүргізуге машықтанады.
Осындай бағдарлама бойынша біздің облыс мамандарының да білімін жетілдіруіне бастамашы болған ВШКУ РАНХиГС Қамқоршылық кеңесі мүшесі Жомарт Көшербаев. Бұл игілікті іс аталған жоғары білім ордасының директоры Сергей Календжянның тікелей көмегімен жүзеге асырылды. Осылайша Қызылорда қаласында ВШКУ РАНХиГС филиалы ашылып, облыстағы түрлі салада жұмыс істейтін мамандардың оқу курсында білім алуына мүмкіндік жасалды. Негізінде «Қызылорда жарығы» холдингі бұл оқу орнымен 2009 жылдан бері тығыз байланыс орнатқан. Осы кезең аралығында холдингтің 40-тан астам қызметкері білімін жетілдірді. Айта кету керек, Ж.Көшербаев 2010-2013 жылы осы оқу орнында Іскерлік әкімшілік басқару докторы бағдарламасы бойынша білім алып, экономика және кәсіпкерлік мамандығы бойынша кандидаттық диссертация қорғаған болатын.
Диплом алған қызылордалық алғашқы 21 тыңдаушының түрлі салада қызмет атқаратынын айта кеткен жөн. Оның төртеуі «ҚЭТТК» АҚ-ның облыстағы компанияларында қызмет атқарса, 10-ы «Қызылорда жарығы» холдингінде жұмыс істейді. Сондай-ақ мемлекеттік қызметте, мұнай компанияларында, бизнес құрылымдарында жұмыс істейтіндер де бар. Компаниялар келешекте басқарушылар құрамын білімді де білікті мамандармен толықтырып тұруды мақсат тұтқандықтан оқу ақысын төлеген. Ал кейбір бизнес құрылымдары мен мемлекеттік қызметте жүргендер, кәсіпкерлер оқу ақысын өз қалтасынан төлеген.
Алғашқы тыңдаушылар қатарында диплом алғандардың бірі «Энергосервис» ЕЖШС директорының орынбасары Еркебұлан Сұлтанбеков оқу процесі тыңдаушылардың мүмкіндігінше жұмыстарынан қол үзбей білім алуларына ыңғайластырып ұйымдастырылғанын айтты. Алғашқы уақытта сырбойылық мамандар Мәскеуге барып оқып қайтса, одан кейінгі кезеңде ресейлік профессорлар мен оқытушылар құрамы Қызылордаға келіп дәріс беріп тұрған. Ал пандемияға байланысты оқу онлайн түріне көшірілген.
Дипломға ие болған келесі тыңдаушы «ҚЭТТК» АҚ-ның бөлім басшысы Гафур Ізтілеуов өзі қызмет атқаратын компания басшылығы келешегінен үміт күтетін жастардың бірі ретінде таңдау жасап, білімі мен біліктілігін жетілдіруге мүмкіндік жасағанына ризашылығын жасырмады. Ол сабақ берген ресейлік оқытушылар құрамының білім деңгейінің өте жоғары болғанын атап өтті.
– Біз бұрын тек таза техникалық маман болсақ, енді бизнес жүргізудің заманауи тәсілдерінің қыр-сырына қаныға алдық. Қаржы, экономика, құқық, заң саласы туралы білімімізді байытып, адамдармен қарым-қатынас жасау, жауапкершілікті ала білу, ұйымдастыру, шешендік шеберлік, стратегиялық жоспарлау, аналитикалық ойлау дағдылары мен келіссөздер жүргізу тактикасы, профайлинг, имиджді қалыптастыру туралы кеңейтілген түсінік алдық. Құқық қорғау қызметіндегі ақпараттық технологиялармен таныстық. Енді біз алған білімімізді өзіміздің компаниямыздың өркендеуіне жұмсайтын боламыз, – деді Г.Ізтілеуов.
Дипломға ие болған мамандармен пікірлесу барысында түсінгеніміз МВА бағдарламасының негізгі мақсаты – тыңдаушыларда кәсіби дағдылар мен басқарушылық құзыреттіліктерді жетілдіріп, заманауи менеджменттің қыр-сырын меңгеруге, көшбасшылық қасиеттерді дамытуға бағытталған. Ал менеджмент – нарықтық экономиканың жағдайларына және мұқтаждығына мейлінше сәйкес келетін басқару типі. Оның ең мәнді функциясы – нақты өндірісті басқару, оны ұйымдастыру және болашағын болжау, әсер ету.
Иә, «білімді озады, білімсіз тозады» дегендей, білімін жетілдірген мамандар көшбасшылық қасиеттерді меңгеріп, сегіз қырлы бір сырлы тұлға болып қалыптасып, келешекте өз компанияларының өсіп-өркендеуіне жұмыс істейтін болады деп үміттенеміз. Ал компаниялар табысқа жетіп жатса, ол өз кезегінде облыс экономикасының алға басуына лайықты үлес болып қосылатыны анық.
Ыдырыс ТӘЖІҰЛЫ,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
