Дәрі тапшылығы болмау керек

560

0

Облыс әкімі Гүлшара Әбдіқалықова облыс бойынша медициналық және фармацевтикалық бақылау, облыстық санитариялық-эпидемиологиялық бақылау департаменттерінің басшыларымен кездесіп, атқарылған жұмыстарды саралады. Алдымен медициналық және фармацевтикалық бақылау департаментінің басшысы Ғалия Байменова 9 айда атқарылған негізгі жұмыстарға тоқталып, өңірдегі ахуалды баяндады.

Жыл басынан бері департамент медициналық қызметке, фармацевтикалық нысандарға жоспардан тыс 131, жоспар бойынша 28 тексеріс ұйымдастырған. Нәтижесінде түрлі дәрежедегі 56 әкімшілік құқық бұзушылық анықталып, жалпы көлемі 3,5 миллион теңгеге жуық айыппұл салынды. Департаментке келіп түскен шағымдардың басым бөлігі медициналық қызметке, емханалардың жұмысына байланысты туындаған.

Мекеме басшысының айтуынша, бүгінде дәрі-дәрмек қорында тапшылық жоқ. «СҚ-Фармация» ЖШС дәрілік қоймасында коронавирусқа қарсы 3,69 миллион теңгенің дәрі қоры сақталған. 

Өңір басшысы шалғай елді мекендегі дәріханаларда препараттар қорын тексеріп, қажеттілікке қарай анализ жүргізу керектігін еске салды.

– Көрші Ресейде эпидемиологиялық жағдайдың ушығуына байланысты бізге де нақты іс-шаралар жоспарын бекіту қажет. Әсіресе, шалғай ауылдар мен аудандарда дәрі тапшылығы болмауын қамтамасыз ету керек. Тұрғындардың шағымдарын ескеріп, департаментке түскен өтініштер бойынша тексеру, бақылау жұмыстарын әлі де күшейтуді тапсырамын, – деді облыс әкімі.

Айта кетейік, облыс әкімдігінің қолдауымен фармацевтикалық ұйымдарды қажетті дәрілік препараттармен қамтамасыз ету үшін 488 миллион теңге қаражат бөлінді. Қазір аймақтағы 17 мекемеге бір жылға 1 пайыз мөлшерлемемен несие берілді.    

Мұнан кейін аймақ басшысы облыс бойынша санитариялық-эпидемиологиялық бақылау департаментінің басшысы Динара Жаңабергеновамен кездесті. Онда өңірдегі эпидемиологиялық ахуал сөз болды.

Жыл басынан бері жауапты департамент жоспардан тыс 815 тексеру жүргізіп, 323 заң бұзушылық анықталып, қорытындысымен жалпы сомасы 37 180 457 теңгені құрайтын  айыппұл салынды. Мекеме білім беру ұйымдарына да тексеріс жұмыстарын жүргізген.

Кездесуде коронавируспен күрес амалдары, вакциналау қарқыны және тұмау мен туберкулезге қарсы екпе жұмыстарын жүйелі ұйымдастыру мәселесі қаралды.

Аймақ басшысы өңірді коронавирус және басқа да инфекциялық ауруларға қарсы дәрі-дәрмек қорымен толық қамтамасыз етуді, халық арасында COVID-19 індетіне қарсы екпе туралы түсіндірме жұмыстарын жандандыруды міндеттеді. Мұнан бөлек, балалар арасында туберкулез ауруына қарсы вакцина салдыру мәселесі (БЦЖ) туралы ата-аналар арасында ақпараттық жұмыстарды күшейту қажеттігін еске салды.

Облыс әкімінің баспасөз қызметі

 


>>> Біздің Facebook, Instagram парақшаларымыз бен Telegram каналымызға жазылыңыз! <<<