Кеше облыс әкімі Нұрлыбек Нәлібаев Шиелі ауданына жұмыс сапарымен барып, биылғы алғашқы дән себу іс-шарасына қатысты. Дәстүрлі шараға облыстық мәслихат төрағасы Мұрат Тілеуімбетов, Қазақстанның Еңбек Ерлері Абзал Ералиев, Имамзада Шағыртаев, аудан әкімдері, зиялы қауым өкілдері келді. Аймақ басшысы ауыл шаруашылығы саласының ардагерлерімен бірге қамба астыққа толып, шаруа еңбегі табысты болуына тілектестік білдірді.
Әрі қарай шара қонақтары ауыл шаруашылығы техникалары, тыңайтқыш, гербицидтер және тұқым көрмесімен танысты.
Егін алқабында өткен жиын «Дала күні» семинар-кеңесіне жалғасты. Мемлекеттік мекемелер мен шаруашылық басшылары саладағы өзекті мәселелерді баяндады.
Өткен жылы елімізде диқандарға көктемгі егін, күзгі жиын-терін жұмыстарына 5 пайызбен берілетін жеңілдетілген несие көлемі алғаш рет 500 млрд теңгеден асса, биыл бұл қаражат 700 млрд теңге болды. Диқан қауымға «Кең дала-2» бағдарламасы арқылы қолдау көрсетілуде. Несиенің 85 пайызын «Даму» кәсіпкерлікті қолдау қоры, тек 15 пайызын ғана шаруашылықтар кепілдендіреді.
Алдыңғы жылдары көктемгі және күзгі дала жұмыстарын қаржыландыруға «Аграрлық несие корпорациясы» небәрі 2-3 млрд теңге бөліп келсе, биыл қаржы көлемі тоғыз есе артып, 18 млрд 500 млн теңгеге жетті. Одан бөлек, ауыл шаруашылығы саласын әртараптандырудағы ірі инвестициялық жобаларды қаржыландыру үшін Солтүстік Қазақстан облысының тәжірибесі негізінде жеңілдетілген несиелендіру бағдарламасы жүзеге асырылуда.
Биыл облыста су үнемдеу технологияларын пайдалану арқылы егіндік көлемін 9 200 гектарға жеткізу, яғни өткен жылмен салыстырғанда 2 есе арттыру межеленген. Бұл бағытта да мемлекеттік қолдау шаралары қарастырылған. Жабдықтарды сатып алуға және құруға кеткен шығындардың 80 пайызына дейін мемлекет тарапынан субсидияланады. Кейінгі жылдары 55 мың гектар күріш алқабы лазерлік тегістеуден өткізілді. Биыл 60 мың гектарға дейін жеткізіледі.
Өңірде 193700 гектарға ауыл шаруашылығы дақылдарын егу жоспарланған, майлы және малазықтық дақылдарды өткен жылға қарағанда 3400 гектарға арттыру көзделіп отыр.
>>> Біздің Facebook, Instagram парақшаларымыз бен Telegram каналымызға жазылыңыз! <<<
