Биыл біздің мектептен түлеп ұшқанымызға да 40 жыл өтіпті. Арамыздан бесеуіміз ұстаздық жолды таңдаған екенбіз. Балғын жүрегіміздің бұл таңдауына ықпал еткен бір ғажап адам бар. Ол – сынып жетекшіміз, жанашыр апайымыз, қазақ тілі мен әдебиетінің мұғалімі, жаны жайсаң, бала жанды асыл адам.
Уақыт зымырап өтсе де, жүректе сақталған сол ұстаз бейнесі баяғы қалпында. Біз әрдайым оқушы кезімізді сөз еткенде, мақтанышпен, сүйсіне, сағынышпен бірінші еске алатын мұғаліміміз – Ұлтай апай!
Ол кезде отыздың асуына енді ғана жеткен, жастық жігері мен білімге деген құштарлығы бойынан көрініп тұрған жас маман еді. Алғашқы күннен-ақ жанына жақын тарта сөйлеп, бірден бәрімізді баурап алды. Сыныптағы барлық қыз оған еліктейтін. Киім киісі, жүріс-тұрысы – бәрі-бәрі ерекше, нағыз ұстазға тән парасат пен сымбаттың үлгісіндей көрінетін. Біз үшін апай тек мұғалім емес, өнеге мектебі еді.
Ұлтай апай мұғалімге тән қатал болғанымен, өте әділ, ақынжанды еді. Сабақ түсіндіргенде, әр сөзі жанды бейнеге айналып, өзімізді сол шығарманың ішінде жүргендей, бәрімізді ұйытып алып кететін. Мұғалімнің айтқаны – біз үшін заң. Әр тапсырманы мүлтіксіз орындауға тырысатынбыз.
Тәрбие сағаттарын да ерекше әсерлі, мазмұнды етіп өткізетін. Түрлі маман иелерін шақырып, олардың өмір жолы мен жетістіктерін таныстырып, бізге бағыт-бағдар беретін.
Мен де сабаққа белсенді қатысып, жақсы оқыдым. Тағы бір ерекше қасиеті – еңбекқорлық, табандылық, адамгершілік, адалдық пен биік парасаттылық. Біз оны оқушы ретінде шын жүректен жақсы көрдік, әрдайым құрмет тұттық.
Жоғары оқу орнына түскеннен кейін де, ауылға барған сайын сәлем беруді өзімізге парыз санадық. Себебі жаны ізгілікке тұнған Ұлтай апайымыз – туған анамыздай жанымызға жақын, жанашыр, сырлас дос, ақылшымыз. Әлі күнге дейін алдында өзімізді сол баяғы оқушыдай сезінеміз. Себебі Ұлтай апайымыз – балғын балалық шағымызда әрқайсымыздың жүрегімізге жол тауып, ұстазға тән мейіріммен қамқор болып, өмірлік мақсатқа жетуде шабыт сыйлай білген көреген ұстаз.
Қандай жетістікке жетсем де, сол табыстарымның төрінде ұстазымның еңбегі жататынына бек сенімдімін.
Ғани БЕЙСЕМБАЕВ,
ғалым, ұстаз, шәкірті
