«Кітап – ақылына ақы сұрамайтын алтын қазына» деген екен түркі халқының ұлы ақыны Әлішер Науаи. Шындығында, адам баласы кітап оқу арқылы ішкі мәдениетін қалыптастырып, рухани таным деңгейін арттырады. Қарапайым ғана мысал, халқымыздың төл тарихы, сан ғасыр бойы сақталған ұлттық айшықтары бүгінгі күнге кітап арқылы жетіп отыр. Соның бір айғағы, Мемлекет басшысының Жарлығымен 23 сәуір – Ұлттық кітап күні болып бекітілді.
Облыс орталығындағы іргелі рухани шаңырақ – Ә.Тәжібаев атындағы ғылыми-әмбебап кітапханасында 400 мыңнан астам кітап бар. Сол құнды дүниелердің оқырман жүрегіне жол тауып, мақсатына сай қызмет етуін үйлестіретін, автор мен оқырман арасында ілкі байланыс орнататын кітапханашылар еңбегі өз алдына бір бөлек тақырып десек болады. Айталық, осы салада қырық жыл қызмет атқарып, елдің алғысына бөленген Мәдениет қайраткері, «Ерен еңбегі үшін» медалінің иегері Күлбаршын Сисекеева биыл 75 жасқа толып отыр.
Сонау 1970 жылдары еңбек жолын облыстық кітапханадан бастаған жас маман жаңа ортаға тез бейімделіп, сүйікті ісіне қызығушылықпен ден қойған еді. Расында сөрелерде қатар-қатар тізіліп тұрған том-том туындыларда тұнып тұрған тарихи деректер, ғылыми еңбектер, ұлт құндылығын айшықтайтын этнографиялық жазбалар, қазақ және әлем әдебиетінің көркем шығармалары іздеген жанға азық боларлық мол қазына екені даусыз. Ал осынау қисапсыз байлықты күтіп, саралап, сақтай білу үшін кітапханашылар тарапынан да аса ұқыптылық, ыждағаттылық керек. Осы қасиеттерді бойына сіңірген кітапханашы Күлбаршын Раушанбекқызы өзінің тұтас еңбек жолын осы саламен байланыстырды.
Атап айтар болсақ, қалалық №7, №8 және облыстық жасөспірімдер кітапханасын басқарды. Жиырма жылға жуық Ә.Тәжібаев атындағы облыстық әмбебап-ғылыми кітапханасының директоры қызметін атқарды. Ол әркез кітапханашылардан өз жұмысына сай жоғары жауапкершілікті талап ететін. Сонымен қатар, көпшілікпен қарым-қатынас мәдениетіне мән беріп, оқырман сұранысына орай қызмет көрсетуге көңіл бөлетін. Иә, бір қарағанда, оңай жұмыс болып көрінетін кітапхана қызметінің де өзіне тән қиындықтары бар. Білікті басшы ондай мәселенің барлығын байыппен шешіп, алдағы жоспарын да айқындай білетін.
Кітапхана қызметін жүйелі жолға қойып, өңірлер арасында тәжірибесімен танылған Күлбаршын Сисекеева Кітапханалар ассоциациясы кеңесінің мүшесі болды. Бірнеше мәрте кітапханалық ассоциациялар мен мекемелердің халықаралық федерациясы жұмысына, Судак қаласында өткен халықаралық Қырым конференциясына, республикалық І әйелдер съезіне делегат болып қатысты. Алматы қаласында өткен республикалық Кітапханашылар съезіне облыстан делегат болып сайланып, мандат комиссиясының жұмысын басқарды. Осы жиында ол «ҚР Оқу-ағарту ісінің үздігі» белгісімен марапатталды.
Ел өміріндегі саяси, мәдени шаралардан да шет қалмайтын Күлбаршын Раушанбекқызы облыстық мәдениет басқармасының алқа мүшесі болып, «Руханият» партиясының облыстық филиалын басқарды.
Мәскеу, Санкт-Петербург қалаларындағы мәдени бағдарламаларға байланысты Ресей мемлекеттік және Салтыков-Щедрин атындағы кітапханалардан деректер жинап, Қызылорда қаласы астана болған жылдары басылып шыққан әдебиеттер тізімін жасап, кітапхана қорына қосты. Сондай-ақ облыс әкімдігі және Қорқыт ата атындағы Қызылорда мемлекеттік университетінің құрастыруымен жарық көрген 200 томдық «Сырдария кітапханасының» редакциялық алқасының құрамында болды.
Аймақтың мәдениет саласында ұзақ жыл абыройлы қызмет атқарып, айшықты қолтаңбасын қалдырған Күлбаршын Сисекееваның еңбегі лайықты бағаланып, Мәдениет қайраткері атанып, бірқатар жоғары марапат иеленді. Сонымен бірге, әріптестерінің қалтқысыз құрметіне бөленді.
– Күлбаршын Раушанбекқызы еңбекқорлықты, талапшылдықты сүйетін білікті басшы болды. Әйел-анаға тән кең жүрек, ер адамға бергісіз өр мінез, ақыл мен парасат, білім мен іскерлік бір бойынан табылатын. Дана халқымыз «Жақсының жақсылығын айт, нұры тасысын» демей ме?! Ол кісі басшылық қызметте болған кезінде кім көмек сұрап барса да еш уақытта қолын қайтармайтын, ақылын айтып, қолдап, демеп жіберетін. Қызметкерлер осы қасиетін бағалай білетін.
Тәуелсіздіктің алғашқы жылдарында кітапхана ғимараты құлап, оңтайландыру саясатымен балалар, жасөспірімдер және облыстық кітапхана бір ғимаратқа көштік. Сонда барын базар ете білетін кітапханашылар көптеген жұмыс атқарды. Өз күштерімен қараусыз қалған ғимаратты әктеп, сырлап, қалыпқа келтіріп, бес жүз мыңға жуық кітап қорын жиһазымен қоса тасыды. Аз ғана ұжымның үлкен істі ауызбірлікпен атқарып шығуы басшымыздың мықтылығының арқасы десек, артық айтқандық болмас.
Күлбаршын апайымыз өзінің ашық-жарқын мінезімен, адами биік болмысымен, қарапайым қалпымен көпке үлгі болды. Әрине, жастарға қаттырақ талап қойып, тәрбиеледі. Бірақ соның барлығы ұжымның ортақ абыройы үшін екенін білгендіктен, ешкім ол кісіге қарсы келмейтін. Есесіне, осындай қатал талап қойып, бәрімізді білікті, білімді, бесаспап болуға тәрбиеледі, – дейді Ә.Тәжібаев атындағы облыстық әмбебап-ғылыми кітапханасы директорының орынбасары Айгүл Жанғабылова.
Мәдениет саласының майталманы Күлбаршын Сисекеева бүгінде ұрпағының шаттығына бөленіп отырған аяулы ана, бақытты әже. Сала ардагерлері қатарында мәдениетке, оның ішінде кітапхана жұмысына қатысты жаңалықтардан сырт қалмай, қоғамдық ортада ой-пікірін білдіріп отырады. Бүгінде елімізде кітапхана қызметіне ерекше мән беріліп, Ұлттық кітап күнінің аталып өтуі де сала жұмысының деңгейін көтеріп, дәрежесін арттыра білген осындай мықты мамандар еңбегінің нәтижесі болса керек.
Ғазиза ӘБІЛДА,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
