Ұлы Абайдың мерейтойына орай әртүрлі деңгейде ауқымды іс-шаралар өткізіліп жатыр. Осы ретте ғұлама, ойшыл, ағартушы, ұлттың жаңа әдебиетінің негізін қалаушы, аудармашы ретінде ел тарихында өшпес із қалдырған ақынның шығармаларын насихаттап, зерделеу қолға алынды.
Жақында Жаңақорған аудандық ішкі саясат бөлімінің «Жастар ресурстық орталығы» және «Ашық азаматтық қоғам» ақпараттық ресурстық орталығының ұйымдастыруымен «Абай жаққан бір сәуле сөнбеу үшін» атты шығармалар байқауы жарияланды.
Бұл іс-шараны өткізудегі мақсат – табиғат пен қоғамның, адам мен заманның сырына терең бойлаған кемеңгер ойшылдың өмірін кеңінен насихаттап, шығармаларына шолу жасау және туындыларын жастардың бойына сіңіріп, терең түсінуге баулу.
Қазір онлайн байқауға өтінімдер қабылданып, шығармалар ұсынылуда. Шараға мектеп оқушылары мен студенттер қатыса алады. Шығармаларды іріктеу кезінде мазмұнын анықтайтын ой тереңдігіне, әдебиет көздерін орынды пайдалануына, белгілі бір стильде жаза білуі мен орфографиясына мән беріледі.
Жеңімпаздарға арнайы сый-сияпат табысталады.
Сара АДАЙБАЕВА,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<