Кеше облыс әкімі Гүлшара Әбдіқалықова мен қала әкімі Нұрлыбек Нәлібаев Қызылорда қаласындағы “Анвар”, “Қызылорда”, “SMALL” әлеуметтік сауда үйлерінде болып, баға тұрақтылығын бағамдады. Сонымен бірге сауда нысанындағы санитарлық талаптардың орындалуын көрді.
Алдымен, аймақ басшысы “Анвар” сауда үйінің жұмысымен танысты. Сауда үйінің сөресінде 8000 тауар түрі бар және тұтынушыларға арналған 5 касса жұмыс істейді. Оның ішінде 1 касса мүгедек жандарға арналған.
– Бүгінде бізде әлеуметтік маңызы бар 19 түрлі тауар арнайы бекітілген бағамен сатылады. Оның ішінде күнделікті қолданылатын күріш, макарон, ұн, қант өнімдері бар. Барлық өнім жеткілікті әрі қолжетімді. Сақтық шаралары да толығымен сақталуда, – дейді сауда үйі директорының орынбасары Гүлнұр Қуаныш.
Осы ретте қала әкімі облыс басшысына халық үшін маңызды әлеуметтік тауарлардың межелі бағасы республикалық баға талаптарына сәйкес екенін жеткізді.
Облыс әкімі мұнан кейін “Қызылорда оптомаркет” сауда желісінде болды. Сауда үйінің сөресінде 10 000 тауар түрі бар. Тұтынушыларға арналған 9 касса жұмыс жасайды. Бүгінде сауда желісінің қаладағы 5 филиалы 115 адамды тұрақты жұмыспен қамтып, халыққа қызмет көрсетеді.
Оптомаркетті аралау барысында облыс әкімі сауда желісінің басшысына күнделікті қолданыстағы азық-түлік өнімдері тапшылығының туындамауы керектігін атап өтті. Сондай-ақ, қажетті қорды жасақтау міндетін қойды.
Үшінші нысан – қаладағы ірі желі SMALL сауда үйі. Мұнда да халықтың күнделікті қолданатын азық-түлік бағалары назарға алынды.
«SMALL» сауда үйінің қала бойынша 5 филиалы бар. 100-ге жуық адам тұрақты жұмыспен қамтылған.
Сауда үйін аралау кезінде облыс әкімі Гүлшара Әбдіқалықова қала әкімі мен Қызылорда қалалық тауарлар мен көрсетілетін қызметтердің сапасы мен қауіпсіздігін бақылау басқармасы басшысының орынбасарына ашық базарларда санитарлық нормалардың сақталуын қадағалап, тұрғындардың бетперде режимін сақтауын бақылауға алуды тапсырды. Халық жиі шоғырланатын сауда нысандарында дезинфекциялық шаралар қарқынды жүруі тиіс. Сонымен бірге, азық-түлік бағасын тұрақты бақылауда ұстап, қажетті қорды алдын ала жасақтау қажет.
– Өздеріңіз білетіндей, өңірде карантин шаралары кезең-кезеңімен жеңілдетілуде. Осыған сәйкес, Қызылорда қаласында бірқатар жұмыстар жасалды. Соның бірі – мобильдік топтар құрылып, кәсіпкерлік нысандар мен сауда орындарына зерделеу жұмыстарының жүргізілуі. Нәтижесінде сауда үйлерінің карантиндік талаптарды толық орындап жатқанын көрдік. Дегенмен, ашық базарлардағы санитарлық талаптардың сақталуын қадағалау әркез пысықталып тұруы қажет. Ол бойынша да алдағы уақытта жұмыстар жалғасатын болады, – дейді қалалық тауарлар мен көрсетілетін қызметтердің сапасы мен қауіпсіздігін бақылау басқармасы басшысының орынбасары Гүлмира Сыздықова.
Мейрамгүл ДАУЫЛБАЙҚЫЗЫ,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
